Hargaysa(Dawan): Saddex qof ayaa ku geeriyooday hal qofna dhaawac fudud ayaa ka soo gaadhay shil babuur oo shalay gelinkii danbe ka dhacay tuulladda Galoolay oo ku taalla jidka u dhexeeya magaalooyinka Burco iyo Sheekh.
Gaadhigan uu ka dhashay shilkaasi dhimashadda keenay oo noociisu ahaa kuwa loo yaqaano SURF ayaa sida la sheegay ka tegay magaaladda Hargaysa una socday dhinaca magaaladda Burco, kaasi oo kula rogmaday ama kula Gadoomay dadkaasi jidka u dhexeeya Sheekh iyo Burco.
Saddexda ruux ee ku geeriyooday shilkaasi ayaa la sheegay in ay dhamaantoodba isku qoys ahaayeen, kuwaasi oo ay magacyadoodu kala ahaayeen Marxuum Saleebaan Cumar Qaalib, oo ahaa guddoomiyihii shirkadda socdaalka ee Salaama, iyo hooyadii marxuumad Faadumo Warsame iyo walaashii marxuumad Xamda Cumar Qaalib.
Labadda haween ah ee shilkaasi ku geeriyooday oo ay midna marxuumka hooyadii ahayd midna walaashii ayaa la sheegay in uu isla shalay gelinkii hore ka soo qaaday madaarka diyaaradaha magaaladda Hargaysa, iyagoo ka yimid dalka Maleeshiya una socday dhinaca magaaladda Burco.
Taliyaha ciidamadda booliska ee degmadda Sheekh Aamin Muxumed Cabdi, oo ka mid ahaa dadkii u gurmaday dadkii uu shilku haleelay ayaa warbaahinta uga waramay wixii kula kulmay markii uu gaadhay meesha shilku ka dhacay.
Waxaanu yidhi “Geeri ayaa dhacday, marxuumiinta dhintay eheladoodii ILLAAHAY Samir iyo iimaan haka siiyo. Geeri xun ayaa dhacday, halkii ay ka dhacday dadkii u horeeyay ayaan ka mid ahaa, qoladda reer Galoolay ee uu ku ag dhacay baabuurku ayuun baa iiga horeeyay, laakiin maamul ahaan degmadda aniga ayaa ugu horeeyay.
Waxaanan halkaa kula kulmay saddex qof oo mayd ah iyo alaabtoodii iyo gabadh aan waxba qabin oo la socotay dadka dhintay. Wixii alaab ahayd ee ay siteen iyo dahabkii ay dumarku xidhnaayeenba gacanta Ayaan ku dhigay, waxaanan ku wareejiyay eheladoodii markii ay yimaadeen Maydkii iyo alaab wixii aan u hayayba. ILLAAHAY-na waxaan uga baryayaa in uu Samir iyo iimaan ka siiyo eheladoodii ay ka baxeen dadkaasi isku qoyska ah”.
Mudooyinkan danbe ayaa waxaa Somaliland si aad ah ugu soo badanayay shilalka gaadiidka, iyadoo intii lagu jiray bishan Ramadaan ay dhaceen shilal badan oo sababay khasaare balaadhan oo dhimasho iyo dhaawacba isugu jiray.
By: Khadar Cabdi Muuse
Dawannews Hargeysa office