Xoghayaha Difaaca Maraykanka, Pete Hegseth, ayaa xaqiijiyay inuu booqasho ku tagay Bariga Dhexe, xilli ay soo baxayeen warar sheegaya inuu kulan aan hore loo shaacin la yeeshay Ra’iisul Wasaaraha Israa’iil, Benjamin Netanyahu. Hegseth ayaa bartiisa bulshada ee X ku baahiyay sawir isaga oo la jooga askar Maraykan ah, waxaanu sheegay in ay sharaf u ahayd la kulanka ciidamada Maraykanka ee hoos taga Taliska Dhexe ee Ciidamada Maraykanka (CENTCOM). Si kastaba ha ahaatee, ma aanu bixin faahfaahin cad oo ku saabsan kulanka la sheegay inuu la yeeshay Netanyahu.
Warbaahinta Axios iyo Walla ayaa, iyaga oo soo xiganaya ilo xog-ogaal ah, sheegay in kulankaasi uu ka dhacay garoonka diyaaradaha Ovda ee ku yaalla magaalada Eilat ee koonfurta Israa’iil. Dhanka kale, wargeyska Jerusalem Post ayaa qoray in saraakiil ka socday Imaaraadka Carabta ay sidoo kale ka mid ahaayeen dadkii kulanka joogay. Hase yeeshee, faahfaahinta kulanka iyo ajandihiisa weli si rasmi ah looma xaqiijin.
Wasaaradda Difaaca Maraykanka ayaan weli faahfaahin ka bixin kulanka la sheegay, taas oo ka dhigaysa in xogaha ku saabsan kulanka ay weli ku tiirsan yihiin wararka ay baahiyeen warbaahinta iyo ilo xog-ogaal ah. Wararkan ayaa imanaya xilli ay jiraan xiisado siyaasadeed iyo kuwo amni oo ka taagan Bariga Dhexe. Madaxweynaha Maraykanka, Donald Trump, ayaa la sheegay inuu taageerayo Netanyahu ka hor doorashooyinka guud ee Israa’iil, halka saraakiisha milatariga Iiraan ay ka digeen suurtagalnimada in mar kale uu qarxo dagaal dhex mara Iiraan iyo Maraykanka.
Booqashada Hegseth iyo kulanka la sheegay ayaa sidaas darteed dhalinaya su’aalo ku saabsan wada-shaqaynta amni ee Maraykanka iyo Israa’iil, doorka Imaaraadka Carabta, iyo tallaabooyinka diblomaasiyadeed ee la qaadi karo si looga hortago in xiisadaha gobolka ay isu beddelaan dagaal cusub.
Kulanka Pete Hegseth iyo Benjamin Netanyahu:
Sida ay sheegtay idaacada BBC, wakaaladda wararka Axios ayaa soo xigatay laba ilo-wareed oo xog-ogaal u ah arrintan, kuwaas oo sheegay in Xoghayaha Difaaca Mareykanka, Pete Hegseth, uu Isniintii kulan la yeeshay ra’iisul wasaaraha Israel, Benjamin Netanyahu, intii uu booqasho aan horay loo shaacin ku joogay dalkaas.
Hase yeeshee, wakaaladda wararka Reuters ayaa sheegtay inaysan weli si madax-bannaan u xaqiijin karin booqashada. Wasaaradda Difaaca Mareykanka ayaa ka gaabsatay inay arrintan ka hadasho, halka safaaradda Israel ee Washington aysan ka jawaabin codsi ay Reuters u dirtay oo ku saabsanaa booqashada.
Warkan ayaa soo baxay maalin kaddib markii Madaxweynaha Mareykanka, Donald Trump, uu ku dhawaaqay inuu taageersan yahay Netanyahu, xilli doorashada baarlamaanka Israel ay dhici doonto toddobaadka soo socda.
Doorashadan ayaa noqonaysa tii ugu horreysay ee guud ahaan Israel ka dhacda tan iyo weerarkii Xamaas ee 7-dii Oktoobar 2023, kaas oo saameyn weyn ku yeeshay dalka, isla markaana Bariga Dhexe geliyay marxalad qalalaase ah. Tan iyo xilligaas, Israel waxay dagaallo ka gashay Gaza, Lubnaan iyo Iran.
Iran ayaa uga digtay Mareykanka iyo Israel inaysan marmarsiinyo uga dhigan doorashooyinka soo socda ee dalalkaas si ay weerar cusub ugu qaadaan Iran.
Saraakiisha milatariga Iran ayaa maalmihii la soo dhaafay marar badan sheegay inay diyaar u yihiin iska horimaad milatari oo cusub oo ay la galaan Mareykanka.
Waxay sidoo kale sheegeen in haddii uu dib u bilowdo dagaal u dhexeeya Iran, Mareykanka iyo Israel, ay tixgelin karaan “bartilmaameedyo milatari oo cusub iyo hub noocyo kala duwan ah”.