Kooxda kubadda cagta Napoli ayaa xaqiijisay in qalliinkii wadnaha ee lagu sameeyay ciyaaryahankeeda khadka dhexe ee xulka Scotland, Scott McTominay, uu si buuxda ugu dhammaaday guul, iyadoo la filayo inuu dib ugu soo laabto tababarrada kooxda bishan. McTominay oo 29 jir ah ayaa subaxnimadii Talaadada lagu sameeyay qalliin loo yaqaan ablation, kaas oo ah qalliin aan aad u faragelin badan lahayn, laguna saxo garaaca wadnaha ee aan joogtada ahayn.
Qalliinka ayaa ka dhacay Spire Manchester Hospital, kaddib markii dhakhaatiirtu ogaadeen inuu ciyaaryahanku qabo xaalad fudud oo la xidhiidha isku-dheellitir la’aanta garaaca wadnaha.
McTominay ayaa ciyaartiisii ugu dambaysay u saftay Napoli 30-kii August, markaas oo laga saaray garoonka daqiiqaddii 56-aad, ciyaar ay Napoli 2-1 kaga guuldarraysatay kooxda Como ee horyaalka Serie A. Baadhitaanno caafimaad oo la sameeyay kaddib ayaa lagu ogaaday xaalad fudud oo loo yaqaan arrhythmia, taas oo keenta in garaaca wadnuhu noqdo mid aad u degdeg badan, aad u gaabis ah ama aan si joogto ah u garaacin. Napoli ayaa war ay soo saartay ku sheegtay in qalliinka McTominay uu ahaa mid si buuxda loogu guulaystay, isla markaana ciyaaryahanka loo qorsheeyay inuu nasto muddo laba toddobaad ah, ka hor inta aanu dib ugu laaban tababarrada kooxda.
Kooxdu waxay hore u filaysay in xiddigii hore ee Manchester United uu garoomada kusoo laaban doono kaddib fasaxa ciyaaraha caalamiga ah, horraanta bisha October. Markii la shaaciyay xaaladdiisa caafimaad, McTominay ayaa farriin u diray taageerayaasha Napoli isagoo bartiisa Instagram ku qoray in aanu muddo dheer maqnaan doonin, isla markaana uu dhawaan dib ula midoobi doono kooxda. Habka qalliinka ablation-ka wadnaha ayaa lagu saxaa calaamadaha khaldan ee korontada ee sababa garaaca wadnaha ee aan caadiga ahayn. Dhakhaatiirtu waxay isticmaalaan kulayl ama qabow si ay u sameeyaan raadad yaryar oo xanniba calaamadaha khaldan, taas oo ka caawisa wadnaha inuu ku laabto garaaciisii caadiga ahaa. Guusha qalliinkan ayaa war wanaagsan u ah McTominay, Napoli iyo xulka qaranka Scotland, iyadoo taageerayaashu hadda sugayaan waqtiga uu xiddiga khadka dhexe dib ugu soo laaban doono garoomada kubadda cagta.