Hargeysa (Dawan):- ILAAHAY ha u naxariistee waxaa toogasho shalay galab ku geeriyooday Marxuum Xuseen Maxamuud Caawaalle oo ku magac dheeraa (Gacmadheere) kana mid ahaa ganacsada waaweyn ee reer Somaliland ee xoolaha dhoofisa, ka dib markii xabad uu riday nin askari ah oo ku sugnaa bar kaantarool oo ku taalla tuulada Qoton Dabo ay caloosha kaga dhacday taasoo uu u geeriyooday.
Marxuum Gacmadheere,ayaa ka mid ahaa wefti shalay ku soo socday dhanka caasimada Hargeysa oo ay ka mid ahaayeen Xildhibaan Jamaal Dhugad oo ka tirsan golaha Guurtida Somaliland.
Wararka la xidhiidha toogashada Marxuum Gacmadheere ee illaa imika uu helay wargeyska Dawan ayaa intaa waxay raacinayaan in Marxuumku gaadhiga uu watay ka dambeeyay weftiga kale ee ay wada socdeen isla markaana goor dambe oo shalay galintii dambe ah in uu soo gaadhay kaantaroolka tuulada Qoton Dabo halkaasoo ay ka dhacday toogashada uu u geeriyooday in kasta oo aanay wararku wax tafaasiil ah ka bixinin qaabka ay dilkani u dhacday iyo goobta ay weftigu ka yimaadeen midna.
Dhinaca booliska ooaanu la xidhiidhnay ayaanay noo suura galin tafaasiil ka badan in dilkaasi uu dhacay oo kaliya ayaanay ku gaabsadeen saraakiil ka tirsan ciidanka booliska oo aanuwax ka waydiinay sida ay u dhacday dilka Marxuum Ganacsade Xuseen Maxamuud Cawaale(Gacmadheere)
Waxaa kale ooaanu isku daynay inaanu wax ka waydiino sida falkani u dhacay iyo in la qabtay askariga dilka geystay Xildhibaan Jamaal Dhugad oo xalay Maydka Marxuumka soo qaaday oo keenay Hargeysa waxaanu gaabsaday in xilliga aanu la hadlaynin oo uu siday Maydkii wax war ahna aanu na siin karin.
Marxuum Xuseen Maxamuud Cawaale(Gacmdheere)ayaa ka mid ahaa ganacsatadii waawaynayd ee xoolaha dhoofin jirtay islamarkaana kamid ahaa odayaasha Somaliland ee ka soo qayb qaatay halgankii dalka lagu xoreeyay iyo dib u dhiskii Somaliland iyo nabadayntii beelaha.
Geesta kalena Madaxweynaha Jamhuuriyada Somaliland, Mudane, Axmed Maxamed Silaanyo waxa uu tacsi u dirayaa, Qoyskii, Ehelkii, Qaraabadii, Asxaabtii iyo Shacbiga Somaliland ee uu ka baxay Alle ha u naxariitee Marxuum Xuseen Maxamuud Cawaalle (Gacmadheere) oo ku geeriyooday shalay 22/03/2015, gobolka daadmadheedh, kana mid ahaa Odayaashii ka soo shaqeeyey nabadayntii iyo dib u dhiskii dalka, sidoo kalena ka mid ahaa ganacsatada dalka ee xoolaha dhoofiya.
Madaxweynuhu marxuumka waxa uu Alle uga baryayaa inuu naxariistii jannatul fardawsa ka waraabiyo, Qoyskii, Eheladii, Qaraabadii, Asxaabtii iyo shacbiga Somaliland ee uu ka baxayna Samir iyo iimaan saadiqa ka siiyo.IN-NAA LILLAAHI WA IN-NAA ILAYHI RAAJICUUN.”
By: Faysal Xiis Weerar(Afgaab)
Dawannews Hargeysa office
