Hargeysa(Dawan):-Xukuumadda Somaliland ayaa si adag uga hadashay tallaabada ay ka qaadanayso dilka ka dhex dhaca ciidanka gudihiisa isla markaana caddaysay halka ay ka taagan tahay dilkii taliyihii Ciidanka Birmadka gobolka Saaxil oo dorraad Alle ha u naxariistee Xidigle Aadan Guuleed Daahir oo uu toogasho ku dilay Askari boolis Cabdirisaaq Maxamed Khayre,
Wasiir ku-xigeenka Amniga daakhiliga Maxamed Muuse Diiriye oo wargeyska Dawan Xalay khadka telefoonka ugu waramay,ayaa meesha ka saaray in dilalka ciidanka gudihiisa ka dhaca ay xallin doonaan ama ka wada hadli doonaan laba qoys ama reer.
“Sarkaalka Berbera lagu dilay waxaa dilkiisa geystay askari ciidanka ka tirsanaa gacanta waa lagu hayaa maxkamaddii ciidankuna way xukuntay, sharciga ayaana la marinayaa qaranka ayaana dhibane ka ah oo uu sarkaalku ka geeriyooday,askariga dilka geystayna sharcigaa la horkeenayaa oo la mariyanaa,”ayuu yidhi Wasiir Maxamed Muuse.
Wasiirka oo ka jawaabayay waxa Xukuumad ahaan uga meel yaalla taliyaha la dilay haddii ay heshiis diyo kala qaadash ah ay wada gaadhaan reerka uu ka baxay iyo beesha gacan ku dhiigluhu ka soo jeedaa,waxaanu yidhi “Horta waxa la dilay waa sarkaal ciidan oo qaranka ka dhintay. qaranka ayaana dhibane ka ah,lama diidana in uu sarkaalku reer ka soo jeedo oo uu qoys iyo beel ka dhashay laakiin sida qofka shicibka ah laba reer iyo cuqaal ay uga wada hadlaan looga wada hadli maayo. waa askari ciidan oo dalku leeyahay oo sarkaal u ah markaa aanay saamayn ugu yeelan qaranimada dilalka ciidanka ee labadii sanno ee ugu dambeeyay dalka ka dhacay, si jiritaanka ciidanka dalku u noqdo mid qaran waa in dilka saraakiisha iyo guud ahaan ciidanka cidda disha sharciga la mariyaa oo loo qisaasaa haddii kale diyada reeruhu kala qaadanayaan waxay dhaawacaysaa kalsoonida ciidanka.”
By:Faysal Xiis Weerar(Afgaab)
Dawannews Hargeysa office
