Hargeisa (Dawan): Wasaarada Arrimaha Dibedda iyo Iskaashiga Caalamiga ee Somaliland ayaa deeq lacageed gudoonsiisay gudidda wadda dhismaha Maktabadda Qaranka oo dhismaheedu ka socodo caasimadda Hargaysa. Munaasibadii lacagtaasi lagu wareejinayay waxaa ka soo qayb galay masuuliyiin ay ka mid ahaayeen Wasiir ku Xigeenka Arrimaha Dibedda iyo Iskaashiga Caalamiga Somaliland, Axmed Aaadan Ismacil (Ahmed keyse), safiirka Somaliland u fadhiya dalka UK Cali Aadan Cawaale, la-taliyaha Madaxweynaha Saxaafadda Khadar , Hassan Cali Gas Agaasimaha Guud Wasaaradda arrimaha dibadda C/raxmaa Abdeeq Muxumed xubno ka socoday gudiida maktabada qaranka iyo masuuliyiin kale.
Madasha gudoonsiinta waxa hadal kooban ka jeediyey wasiir ku Xigeenka Arrimaha Dibedda iyo Iskaashiga Caalamiga Axmed Aaadan Ismacil (Ahmed keyse), oo ka waramay sida ay ku timid lacagtan loogu deeqay dhismaha maktabadda qaranka iyo cidda soo bixisay.
“Waxaan jecelahay in aan halkan ku gudoonsiino gudoomiyaha maktabada Akriska Qaranka Somaliland oo Hargaysa laga dhisayo Axmed Daahir Cilmi. Deeqdan oo ay wasaaraddu markii hore u balan qaaday oo ay ugu tallo gashay inay gacan ka gaysto dhismaha maktabada qaranka Somaliland, oo ah markii u horaysay yeelanayso. Deeqdani runtii wasiirkii hore ee Arrimaha Dibedda Maxamed Biixi Yoonis ayaa balan qaaday sidii wasaaradaha kale shirkii u horeeyay lagaga dhawaaqay 25 Wasaaradood, waxaan filayaa in aan noqonayno wasaaradii labaad ee bixisay balan qaadkii. Maxamed Biixi Yoonis lacagta $5000 kun dollar ayuu maalintii kaash noogu dhiibay, laba bilood ka hor. Waxaanu halkan ku cadaynaynaa in aau ku wareejinay umadda reer Somaliland iyo cidii kale ee na daawanaysa gudoonsinay maktabadda akhriska Somaliland $5000 kun dollar.”
Wasiir Kayse, ayaa dhinaca kale ugu baaqay wasaaradaha kale ee dawlada iyo hay’adaha kaleba inay gacan ka gaystaan dhismaha maktabada akhriska “Waxa kale oo aan intaa ku dari lahaa wasaaradihii kale 25 ahaa inay iska soo bixiyaan lacagihii ayaa hore u balan qaaday in ay fuliyaan oo gacan ka gaystaan dhismaha maktabada. “Waxaan filayaa wasaaradyadu waxay noqonaysaa tii labaad, sidaad og-soon tihiin waxay noqonaysaa wasaaaradii ugu lacagta bad-nayad, wasaaradaha dawlad intaa waxaa bixisay runtii kolay wasiir Maxamed Biixi wuxuu joogga qurbaha. wuxuu ka daawan doona warbaahinta kala duwan halkaa wuxuu ka arki doona aniga iyo agaasimaha guud aanu si rasmi ugu wareejin doono gudoomiyihii maktabada qaranka Somaliland” ayuu yidhi wasiir ku xigeenka arrimaha dibadu.
Agasimaha guud ee wasaaradda Arrimaha Dibadda C/raxmaan Abdeeq Muxumed, ayaa ugu baaqay bulshada reer Somaliland inay gacan ka geystaan dhismaha maktabda akhriska qaranka Somaliland, waxaanu yidhi “Waa in laga qayb qaato maktabada akhris Qaranka Somaliland, oo laga dhisi doono Caasimada Hargaysa, kolay waxay noqon mayso deeqdii u horaysay ee ay bixiyaan dadka reer Somaliland u dhashay. Laakiin noqon doonto tani deeqdii labaad ee ay bixiyaan wasaaradaha dawladu.” Agasimaha ayaa mahad naqay cida gacanta ku haysa dhismaha maktabada akhriska qaranka. “Aad iyo aad ayaan ugu bogaadinayaa cidkasta oo fikarkan lahayd, dedaal badan u gashay, wakhti badan ku qaadatay oo uu ka mid yahay Axmed Daahir Cilmi, cidkastoo garab gashay ama dhiirgelisay, oo jecel inay dhamaato way la qabtaa mahadaasi” ayuu yidhi agaasimaha guud. Gabagabadii waxaa isna halkaasi ka hadlay gudoomiyaha Maktabada akhriska qaranka Axmed Daahir Cilmi, oo uga mahad naqay wasaaradda arrimaha dibadda lacagta ay ku wareejisay waxaanu tilmaamay in ay wasaaradda arrimaha dibadu noqonayso tii labaad ee lacag ugu deeqda dhismaha maktabadda qaranka.