Hargaysa (Dawan): Madaxweynaha Jamhuuriyadda Somaliland Mudane Axmed Maxamed Maxamuud (Siilaanyo), ayaa shalay kumanaan ka mid ah shacbi weynaha ku dhaqan caasimadda Hargeysa kula tukaday Salaad Roob-doon ah garoonka kubbadda cagta ee Hargaysa Stadium.
Salaada Roob-doonta ah oo shalay dalka oo dhan si weyn looga oogay ayaa madaxweyne Siilaanyo waxa uu kumanaan dadweyne ah kula tukaday garoonka kubbadda cagta ee Hargaysa Stadium, waxaa ka qeyb galay Wasiirro ka tirsan xukuumadda, culimawdiin iyo dadweyne kale oo aad u badan. Wasaaradda diinta iyo awqaafta Somaliland ayaa habeen hore ku war gelisay dhammaanba dadweynaha reer Somaliland in laga wada qayb qaato tukashadda salaadda roob-doonta ah si ILLAAHAY looga baryo in uu ka dul qaado abaarta baahsan ee dalka ka jirta, taasi oo saamaysay dad iyo duunyaba. Waxaana shalay gelinkii hore muddo saacado ah aan shaqaynin dhammaanba xafiisyadda dawladda, xarumaha ganacsiga ee gaarka loo leeyahay iyo goobaha waxbarashadda taasi oo ka danbaysay amar ka soo baxay wasaaradda diinta iyo awqaafta si ay dadweynuhu uga qayb qaataan tukshadda salaadii Roob-doonta ahayd.
Madaxweynaha oo tukashadii salaada Roob-doonta ahayd kadib khudbad kooban u jeediyay dadweynihii halkaasi ku tukaday ayaa ku duceeyey in ILLAAHAY ka aqbalo baryada ummadda, isla markaana uu raxmaadkiisa si deg-deg ah ugu shubbo.
Waxaanu yidhi “Waxaan halkan isugu soo baxnay in aan ILLAAHAY ka barinno, in uu Madar (roob) khayr qaba ina siiyo, in uu abaarta innaga kor qaado. ILLAAHAY waxaynu ka barayaynaa in uu quluubteenna isku soo celiyo, in uu khayrka ina waafajiyo.”
Sidoo kale, waxaa halkaasi madaxweynaha Ka hor khudbad ku saabsan Roob-doonta ka jeediyey wasiirka diinta iyo awqaafta Sheekh Khaliil C/laahi Axmed oo isagu dadka tukiyey, waxaanu ku baaqay in la is-wada cafiyo ILLAAHAY-na loo toobad celiyo.“In kulaylkan iyo abaaruhu ay yihiin dunuub dadka ka timid, oo ay ka toobad keenaan waayi, dhibaatada ka timid dunuubtaasina ay saamaysay Bahayinka (xoolaha) iyo makhluuqa kale ee xayawaanku ka mid ka yihiin oo ay gaadhay”ayuu yidhi Wasiirku.
Sidoo kale wasiir Khaliil waxa uu ku adkeeyey bulshadda in la is-caawiyo oo la isu gar-gaaro la isna taakuleeyo cidiba ciddii ay ka hayn roontayna ay wax ku taakulayso dadka tabaalaysan. Dhinaca kale madaxweyne ku xigeenka Somaliland C/raxmaan C/laahi Ismaaciil (saylici), ayaa isna shalay boqolaal dadweyne ah waxa uu salaadda Roob-doonta ah kula tukaday masjidka weyn ee Cali Mataan ee ku yaalla badhtamaha caasimadda Hargaysa. Sidoo kale dhamaanba goboladda iyo degmooyinka dalkan Somaliland ayaa shalay laga tukaday salaadda Roob-doonta ah, iyadoo ay tukashadda salaadahani yihiin mid ay adoomuhu Eebe kaga baryayaan in uu ka soo jabiyo abaaraha baahsan ee dalka ka jira, iyadoo maalmihii la soo dhaafay haraad iyo macaluul ay dad ugu dhinteen gobolka Awdal.
Dawannews Hargeysa office