Hargeysa (Dawan): Qaar ka mid ah abwaannada ugu caansan dalka Jamhuuriyadda Somaliland, ayaa markii ugu horaysay ka hadlay xaalada abaareed iyo siyaasadeed ee dalka.Waxaanay sheegeen in ay ceeb iyo fool-xumo ku tahay xisbiyada inay soo qaadan in xiligan la soo hadal qaado in doorasho ay dalka ka qabsoonto, maadaama oo ay abaar aad u daran ay taagan tahay.
Sidoo kale abwaannadu waxay baaq u direen hoggaamiyeyaasha xisbiyada siyaasada oo ay u soo jeediyeen inay dadkooda,kana feejignaadaan wax kastoo ummadda kala fogaynaya, iyagoo tilmaaamay in xisbi walba wixii uu doonayo in uu ummadan ku hogaamiyo uu horkeeno isagoo xor ah.
Abwaannadan oo kala ahaa Xasan Xaaji Cabdilaahi (Xasan Ganay), Cabdi Aadan Xaad (C/qays), Maxamed Aadan Dacar, Aadan Tarabi Jaamac iyo fanaanka Cumar Xasan Rooraaye.
Ugu horeyn waxaa madashaasi ka hadlay abwaanka weyn ee Xasan Xaaji Cabdilaahi (Xasan Ganay), ayaa masuuliyiinta saddexda xisbi qaran u soo jeediyay in ay la yimaadan wax dadka u cuntami kara oo lagu doorto.Waxaanu yidhi “Waar dalku wuu innaga dhaxeeya, diintu-na way inaga dhaxaysaa, dadku-na way inaga dhexeeyaan. Markaa xisbi waliba waxaa uu doonayo inuu dalka ku hogaamiyo isagoo xor iyo xalaal ah ha horkeeno oo ummadd cunaha u mari kara, waa inuu han iyo himilo dheer yeesha oo uu la yimaadaa wax uu dadka ku soo jiito. Lama taagna maanta mala malayntii Geel jiraha dadkeenina saddex Gu iyo saddex Jiilaal ayaa abaar la isugu bixiyay, sixir-barar baa jira, barbaarteeniibaa Badda ku dhamaatay, gurmad iyo gar-gaar ayay u baahan yihiin ee uma baahna in la isku dhidhiyo. Saddexdii-na xisbi ninkii ummadan wax ka doonayoow si wanaagsan wax uga doono, sidan ay maanta u socoto waxna lagu heli maayo lagu-na hanan maayo.”
Sidoo kale abwaan Xasan Ganay waxaa uu fariin u diray odayaasha dhaqanka ee Somaliland isagoo wax laga xumaado ku tilmaamay hadalada ay mudooyinkan danbe warbaahinta marinayaan. “Ninka ummadda aanu u diranoow ee hore aanu ugu dhiibanoow, ee sulaadiintu ka koow yihiinoow, waxaa cumaamadda la idiin saaray, ee caanaha la idiinku shubay in aad ummadda ka turjuntaan, oo aad noloshooda macnaysaan ee ma aha in aad xafiisyada aad ku gashaan.Ma gayno in maalinba todoba oday inta ay soo fadhiistaan ay yidhaahan anaga ayaa reer hebel ah” ayuu yidhi abwaan Xasan Geney.
Isagoo hadalkiisa sii watay-na waxa uu yidhi “Haddii golaha wasiirrada la yidhaahdo madaxweynihii ayaa baxaya toban baa garab yaacaya, dhagax Kiiloo le’eg ayay afarta gacmood isugu gaynayaan, wuu soo gelayaa waad hor carareysaan.Waar waxaasi iska daaya, oo xafiisyadii-na taga oo umadii-na u shaqeeya oo umadii-na metela dantu-na sidan inoogu dhali mayso, dadka aynu hoos u eegno, dalka aynu hoos u eegno”.
Sidoo kale abwaan Aadan Tarabi Jaamac, oo isna goobtaas ka hadlay ayaa masuuliyiinta xisbiyada u soo jeediyay hadal duur-xul ah kuna aadan doorashada la doonayo in la qabto.waxaanu yidhi “Waxaan idin leeyahay wiil iyo gabadh ayaa diiday inay abaartii is guursadaan, inagu-na abaartii ayaynu madaxweyne-nimo doonaynaa? labaadaasi qof-na way ka xishoodeen inay abaartii is guursadaan oo barwaaqaday ku balameen, waar ILAAHIINA ka yaaba oo maanta rogmad baa taagan, dad baa haraad u dhintay, oo waad og tihiin ee fadhiga ka kaca, Geella duqdiisu durduriso aarankiisa-na maxaad u maleyn.
Waar marka nimankiinii madaxtinimada doonayay aad isu tirisaan dadka idinka hooseeya-na maxay iyagu-na samaynayaan, dhibaatadu halkaasi ka bilaabmayn. Waxaanu nahay wax culus oo fudayd loo haysto. Markaa hantadaadda joojiyo, oo dadkiina u naxariista, salaadiinta iyo dawlada-na maanta salaadiinta ayaa badan”.
Geesta kale abwaan Maxamed Aadan Dacar, oo isna halkaasi ka hadlay ayaa yidhi “Waar ILLAAHAY ka yaaba, dadku-na waa dad wanaagsan oo shaqaystay waxaa lacag socota dadkaa shaqaystay oo cidi waxba umay keenin.
Abaartaasi-na inkaartiina ayay ka dhasheen toobad keena, tu kale oo tan ka weyn ha inoo keenina oo ILAAHAY ka yaaba.”
Abwaan Muuse Cali Faruur, ayaa isna xaaladda abaareed ee dalka ka taagan ku tilmaamay in ay tahay wax aan hore lo arag, waxaanu yidhi “Abaarta dhacday waxaa la yidhaahdaa is-bara oo wax weli wadanka hore uga dhacay ma aha. Dadkii-na heshiis ka dhex dhalisay oo markii la isku soo guuray la is dhunkanayo. Markaa ninka maanta yidhaahda doorasho ayaan doonayaa, ha ogaado inuu qaatay shaanbad aan weligeed ka hadhaynin”.
Dawannews Hargeysa office