Qore:Khadar.M.Dhako.
Hargaysa (Dawan):-Safaaradda Somaliland ee dalka Itoobiya ayaa dalka ku soo celisay saddex dhallinyaro ah oo u Tahriibay dalka Liibiya kuwaas oo laga soo celiyay dalka Suudaan.
Dhallinyaradan lagu soo celiyay dalka oo shalay ka soo degay Garoonka Caalamiga ah ee Cigaal International Airport ee Magaalada Hargaysa ayaa ka warbixiyay soo celintooda Safiir ku Xigeenka Safaarada Somaliland ee dalka Itoobiya Barkhad Maxamuud Kaariye oo ka hadlayay ugu horrayn siday dhallinyaradaa dalka ugu soo celiyeen,ayaa yidhi“Maanta(shalay) waxa Garbahayga taagan dhallinyaro ay soo celisay Dawladda Jamhuuriyadda Somaliland oo u dhashay dalka Somaliland in badanna waxaad Maqasheen dhallinyaro reer Somaliland oo tahriib ka soo noqotay waxa soo celiyay Hay,ado,Safaarada Somaliland ee Itoobiya iyo Wasaaradda Arimaha Dibedda ee Somaliland umay kala hadhin soo celinta dhallinyaradan,waana Waajibaadka ay Wasaaradda Arrimaha dibeddu u xilsaarantahay in la matalo Muwaadiniinta Somaliland taas ayaanay ka mid tahay in dhalinyaradani ay ka soo noqotay dalka Suudaan waxaaana jira dhallinyaro badan oo ku dhibaataysan dalka Liibiya iyo dalalka waqooyiga Afrika waxaanan diyaar u nahay ciddii magafe gacanta ugu jirta in Safaarada Somaliland ee Itoobiya ay Tabantaabiso kuna soo celiso dalkooda,”.
Sidoo kale Cabdixakiim Khadar Siciid oo ka mid ahaa dhalinyaradan la soo celiyay ayaa ka waramay dhibaatooyinkii ay kala kulmeen Tahriibkaas.waxaaanu yidhi“Farxad ayay ii tahay aan la soo koobi karin maanta (Shalay) in aan dalkaygii ku soo noqdo waxaanan Tahriib ku tegay dalka Liibiya,Saddex iyo toban Qof ayaanu ahayn Sideed qof ayaa naga dhintay intayadii kale qaarbaa ka baxsaday magafaha waxyaabo aan la soo koobi karin ayaa naga soo maray Tahriibkaas,”.