Saacadihii ku xigay kulankii El Clásico ee ugu dambeeyay ee dhex maray Real Madrid iyo Barcelona ayaa xiisaddu sii korortay xitaa kaddib markii ciyaartu dhammaatay, iyadoo warbixinno sheegayaan in Lamine Yamal, Pedri, Fermín López, iyo Pau Cubarsí ay Dani Carvajal ka unfollow gareeyeen Instagram. Tallaabadan ay qaadeen ciyaartoyda Barcelona ayaa timid kaddib muranno kulul oo dhex maray ciyaartoyda labada koox kaddib dhamaadkii ciyaarta. Waxaa xusid mudan in Lamine Yamal uu muran dhaliyay ka hor kulanka kaddib markii uu wareysi la yeeshay YouTuber-ka caanka ah Ibai Llanos, halkaas oo uu yidhi: “Real Madrid waa koox tuugo ah oo cabato.” Hadalkaas ayaa si weyn uga xanaajiyay ciyaartoyda Madrid, maamulka kooxda iyo taageerayaasha. Sidaa darteed, dhacdooyinka El Clásico ma aanay dhamaanin markii uu garsooruhu seeriga afuufay, balse waxay raad muuqda ku reebeen xidhiidhka ciyaartoyda labada kooxood. Waxaa sidoo kale muhiim ah in la ogaado in afartan ciyaaryahan ee Yamal, Pedri, Fermín, iyo Cubarsí ay yihiin xiddigo muhiim ah oo ka tirsan xulka qaranka Spain, halka Carvajal uu isna yahay halyeyga difaaca ee isla xulkaas — taas oo laga yaabo inay saameyn taban ku yeelato xasilloonida kooxda qaranka La Roja.
