Dowladda Uganda ayaa joojisay dhammaan safarrada iskuullada ka dib shilkii baska ee fiidkii Khamiista ka dhacay Bariga Uganda ay ku dhinteen 20 arday iyo hal qof oo weyn oo ka qayb qaadanayay safar waxbarasho. Tobanaan qof oo kale, oo ay ku jiraan shaqaale, ayaa ku dhaawacmay shilkii ka dhacay degmada Kapchorwa, oo ku taal bariga Uganda. Baadhitaanno hordhac ah ayaa sheegaya in baska ay cillad farsamo ku yimid ka hor inta aanu darawalku xakamaynin buurta Chekwatit, oo ah waddo ay dhowr shil oo halis ah ka dhaceen, sida ay sheegeen mas’uuliyiinta maxalliga ah.
Dalka Uganda ayaa sanad walba diiwaangeliya kumanaan dhimasho oo ka dhashay waddooyinka, laakiin dhacdadan ayaa ah mid ka mid ah kuwa ugu dhimashada badan ee carruurta ee ka dhaca dalka muddooyinkii ugu dambeeyay. “Tallaabo degdeg ah oo taxaddar leh, waa inaan wax ka qabannaa badbaadada carruurteenna,” ayuu yidhi Wasiirka Waxbarashada John Chrysostom Muyingo, isaga oo ku dhawaaqay mamnuucidda ku-meel-gaadhka ah ee safarrada ilaa baadhitaan buuxa laga dhammeeyo.
“Qaranku wuxuu la kulmay khasaare weyn, waxaan jeclaan lahaa inaan gacmaha is qabsanno si kuwa badbaaday si wanaagsan loo daryeelo,” ayuu raaciyay. Afhayeenka booliiska taraafikada Michael Kananura ayaa sharraxay waxa dhacay Khamiistii. “Darawalkii ayaa la sheegay inuu lumiyay xakamaynta gaadhiga, kaas oo ka baxay wadada, wuxuuna ku dhuftay dhagax weyn oo ku yaal wadada dhinaceeda, ka dibna wuu rogmaday,” ayuu yidhi. Baska, oo siday arday ka timid Dugsiga Hoose ee King David ee Ndejje, ayaa ku dhacay abaare 20:00 wakhtiga maxalliga ah (17:00 GMT) tuulada Chekwatit.
“Nasiib darro, 20 carruur ah iyo hal qof oo weyn, oo ah aasaasaha iyo agaasimaha, Mr Tadeo Ssekade, ayaa dhintay,” ayuu Wasiirka Dowladda Hoose Balaam Ateenyi Barugahara ku soo qoray X, isaga oo goobta jooga. Muuqaallo ay wadaageen dad goobjoogayaal ah ayaa muujinayay in baska uu si xun u burburay, iyada oo dadka deegaanka ay u soo dareereen si ay u caawiyaan carruurta dhaawacantay. Ardaydu waxay ka soo laabanayeen safar waxbarasho, iyada oo warbaahinta maxalliga ah ay ku warramayso inay booqdeen Biyo-dhaca Sipi, oo ah goob dalxiis. Sida ay sheegeen hay’adaha taraafikada, xawaaraha baabuurta, iyo waddooyinka khatarta ah ayaa ka mid ah sababaha ugu waaweyn ee dhimashada waddooyinka ee Uganda.