Hargeysa (Dawan)- Is-kaashiga u dhexeeya Jamhuuriyadda Somaliland iyo Taiwan ayaa si muuqata u sii xoogaysanaya, iyada oo labada dhinac ay si wadajir ah diiradda u saarayaan horumarinta caafimaadka dalka. Kulankii 01 October, 2025 dhex maray Agaasimaha Guud ee Wasaaradda Horumarinta Caafimaadka Somaliland, Dr. Axmed Maxamuud Jaamac, iyo masuuliyiinta Taiwan Mission, wuxuu muujinayaa sida iskaashigan uu u yahay fure muhiim ah oo lagu horumarinayo adeegyada caafimaadka bulshada.
Dadaalladan wadajirka ah ayaa qayb ka ah qorshayaal ballaadhan oo lagu taageerayo mashaariic caafimaad oo tayo leh, kuwaas oo diiradda saaraya tababarada xirfadlayaasha caafimaadka, horumarinta xarumaha caafimaadka, iyo keenista qalab casri ah. Iskaashigan oo salka ku haya wada shaqayn iyo isfaham ayaa horseedaya in Somaliland ay gaadho himilooyinkeeda caafimaad, islamarkaana bulshadu ay helaan adeegyo caafimaad oo wanaagsan.
Kulanka dhex maray Agaasimaha Guud ee Wasaaradda Horumarinta Caafimaadka Jamhuuriyadda Somaliland, Dr. Axmed Maxamuud Jaamac, iyo masuuliyiinta sare ee ka socday Taiwan Mission, ayaa calaamad u ah horumar iyo iskaashi muhiim ah oo lagu taageerayo caafimaadka bulshada Somaliland.
Warbixintii lagu soo bandhigay kulanka ayaa muujisay dadaalka ballaadhan ee Taiwan Mission ku bixiso mashaariicda caafimaadka dalka, kuwaas oo ay ka mid yihiin xoojinta adeegyada caafimaadka bulshada, tababarka xirfadlayaasha caafimaadka, iyo horumarinta qalabka casriga ah ee cusbitaallada. Qiimeyntii la sameeyay ayaa sidoo kale iftiimisay horumarka la gaadhay iyo caqabadaha weli horyaalla, taas oo muhiim u ah qorsheynta mustaqbalka.
Dr. Axmed Maxamuud Jaamac ayaa si kal iyo laab ah uga mahadceliyay taageerada joogtada ah ee Taiwan Mission, isagoo carrabka ku adkeeyay in iskaashigan uu yahay mid lagu gaadhi karo horumar waara oo dhinaca caafimaadka ah. Waxa uu sidoo kale ku baaqay in la ballaadhiyo xidhiidhka labada dhinac si looga jawaabo baahiyaha caafimaad ee sii kordhaya ee dalka.
Kulanka ayaa lagu heshiiyay in la sii xoojiyo wada shaqaynta, lana ballaadhiyo mashaariicda caafimaad ee ka socda Somaliland, si loo hubiyo in adeegyo caafimaad oo tayo leh ay gaadhaan dhammaan bulshada meel kasta oo ay joogaan. Tani waxay muhiim u tahay dhisidda nidaam caafimaad oo waara, kaas oo awood u leh inuu ka jawaabo baahiyaha caafimaad ee dalka.
Dhinaca kale, Masuuliyiinta Cisbitaalka Guud ee Hargeysa ayaa todobaadkii hore qaabilay wefti ka socda Taiwan National University: Taipei, kulankasa oo si weyn loofu falanqeeyay adkeynta xidhiidhka iskaashiga caafimaad ee labada dhinac. Kulankan oo diiradda lagu saaray xoojinta wada-shaqeynta, aqoon-is-weydaarsiyo joogto ah iyo horumarinta adeegyada caafimaadka, ayaa ah tallaabo muhiim ah oo lagu horumarinayo caafimaadka bulshada Somaliland.
Iskaashigan ayaa ka tarjumaya sida ay Somaliland uga go’antahay inay kor u qaaddo tayada adeegyada caafimaad iyo xirfadaha shaqaalaha, taas oo ah udub dhexaadka horumarka bulsho kasta. Aqoon-is-weydaarsiyada joogtada ah ee labada dhinac ayaa fure u noqon doona in la helo adeegyo casri ah oo la jaan qaadaya baahiyaha dadka.
Taageeradan ka imaanaysa jaamacadda Taiwan National University waxay sidoo kale ka dhigan tahay in Somaliland ay si tartiib tartiib ah u dhiseyso shabakadeeda caafimaad ee caalamiga ah, taasoo horseedi karta helitaanka agab iyo khibrad dheeraad ah oo lagu taageero xarumaha caafimaadka dalka. Kulankani wuxuu calaamad u yahay mustaqbal ifaya oo lagu horumarinayo caafimaadka bulshada Somaliland. Sidoo klae waxa uu muhiim u yahay kobcinta tayada adeegyada caafimaad dalka oo la isku haleyn karo, isla markaana u adeegaya danaha guud ee bulshada.