Oog(Dawan):ALLE ha u naxariistee waxaa shalay magaalada Oog Aas Qaran loogu sameeyay Marxuum Cabdi Yuusuf Ducaale(Cabdi Liji) oo ka tirsanaa saraakiill xigeenada ciidanka Qaranka oo habeen hore koox dabley ah oo ka tirsan nabad-diidku toogasho ku dileen gudaha tuullada Saax-dheer.
Marxuum Cabdi Liji oo lagu aasay degmada Oog,ayaa waxaa jinaasada aaskiisa ka qayb galay saraakiisha aagga bari ee Ciidanka Qaranka,madaxdhaqameed iyo dadweyne aad u tiro badan waxaanay marxuumka ILAAHAY uga baryeen in uu u naxariisto oo uu dambigiisa dhaafo.
Saraakiisha aagga bari ee Ciidanka Qaranka ayaa balan aaday in aan laga hadhayn ciddii Dishay Cabdi Liji lana soo qaban doono, si sharciga loogu fuliyo.Waxaanay bulshadda deegaanka u soo jeediyeen in ay ka hor tagaan cid kasta oo isku dayda in ay ku soo dhex dhuumato oo ay deegaanka ka geysato nabad gelyo darro.
Saraakiisha aagga Bari ee Ciidanka Qaranku waxaa kale oo ay caddeeyeen in cidda dambiilaha ahi ay gaar ku tahay dambiga ay geysatay isla markaana aanu cid kale saamayn ku yeelan doonin loona baahan yahay in dambiilaha meel looga soo wada jeedo oo aan hab qabiil iyo reernimo midna aan lagu difaacin loona wada arko in uu yahay qofka sharwadaha ahi mid cadaw ku ah cid kasta.
By:Faysal Xiis Weerar(Afgaab)
Dawannews Hargeysa office
