Madaxweynaha Kenya Uhuru Kenyatta ayaa dab qabadsiiyay 15 tonnes oo fool maroodi ah si uu ugu quus gooyo ugaadhsatada, taasi oo qayb ka ah dadaalka dalkaasi ku yaal bariga Afrika ugu jiro xakameynta ugaadhsatada foolka maroodigu.
Foolkaasi oo qiimaha suuqa madow uu ka joogaa yahay $30m (£19.4m), ayaa ah shixnadii ugu ballaadhnayd ee ay burburiso Kiiniya.
Madaxweyne Kenyatta ayaa markii uu dabka ku qabtay foolkaasi sheegay in uu u badbaadinayo jiilka mustaqbalka nolosha duurjoogta.
Foolka maroodiga ayaa inta badan waxa loo tahriibiyaa Aasiya iyada oo loo adeegsado waxyaabo qurxin ah.
Suuqa madow ayaa halkii kiilogaraam ka yahay 2000 oo doolar.
Wiyisha ayaa sida oo kale waxa loo ugaadhsadaa foolasheeda oo qiime sare lagu raadsado.
Mr Kenyatta ayaa ballanqaaday inay dawladdiisu ay burburin doonto dhammaan wixii fool ah ee dalka yaal oo la filayo inay gaadhayaan ilaa 115 tan marka la gaadho dabayaaqada sannadka.
Sannadkii hore ayaa dawladda Shiinahu waxa uu soo rogey amar ah inuu mamuucay soo dejinta foolka muddo sannad ah kadib markii lagu dhaliilay inuu dalabka ka yimaad uu sii dhiirigeliyo ugaadhsiga foolka.
Kiiniya ayaa waxa ay hoy u tahay ilaa 30,000 oo maroodi.
Dadka u dhaqdhaqaaqa xayawaanka ayaa ka digaya in ay dabar go’i doonaan maraadigu dhawr sano gudahood haddii uu sii socdo dagaalka lagu hayaa.
