Hargaysa (Dawan): Shirkadaha Shaafici iyo Dalsan oo ka mid ah shirkadaha soo waarejidda daawooyinka ayaa shalay wasaaradda caafimaadka ku wareejiyay deeqo lacageed oo ay kaga qayb qaadanayaan dhismaha qaybta gar-gaarka deg-degga ah ee cusbitaalka guud ee Hargaysa.
Munaasibadii ay shirkadahani lacagta ugu wareejinayeen wasaaradda caafimaadka oo ka qabsoontay xarunta cusbitaalka guud ee Hargaysa. Waxaana lacagtaasi kala wareegay wasiirka caafimaadka Dr. Xaglo-toosiye, iyadoo ay goob jog aka ahaayeen agaasimaha cusbitaalka, C/raxmaan Cli Giirre oo ka socday shirkadda Shaafici iyo C/raxmaan Cismaan oo isna ka socday shirkadda Dalsan.
Lacagtana deeqda ah ee ay labadna shirkadood ugu deeqeen dhismaha qaybta gar-gaarka deg-degga ah ee cusbitaalka guud oo isku-geynteedu gaadhaysay $13400 dollar, ayaa Shirkadda Shaafici waxay bixisay $5000 dollar, iyo 60-kartoon oo daawo ah. Halka shirkadda Dalsan-na ay bixisay $8400.
Wasiirka caafimaadka Somaliland Dr. Saleebaan Ciise Axmed (xaglo-toosiye), oo hadal ka jeediyay munaasibadii uu shirkadahaasi lacagta kagala wareegayay ayaa labadaasi shirkadood uga mahad naqay deeqdan lacageed. Waxaanu yidhi “Waxaan halka uga mahad celinayaa labadda shirkadood ee Shaafici iyo Dalsan, oo na soo gaadhsiiyay deeq lacageed oo ay ku darsadeen dhismaha qaybta gargaarka deg-degga ah ee cusbitaalka Hargaysa, aad ayaanan ugu mahad celinayaa. Waxa kale oo aan u mahad celinayaa shirkadihii hore uga qayb qaatay deeqaha lacageed.Shirkaddo badan ayaa iyaguna balan qaad lacageed sameeyay, oo aanu filayno in ay dhawaan dhakhso noo soo gaadhsiin doonaan”.
Wasiirku waxa uu ka waramay wakhtigii la dhisay cusbitaalka guud ee Hargaysa iyo sida uu ugu baahan yahay in la dayac tirro. “Cusbitaalka guud ee Hargaysa waxaa la dhisay sanadkii 1953-kii, xiligaas oo dadka ku dhaqnaa Hargaysa loogu tallo-galay in uu siiyo adeegyadda caafimaadka. Waxaana wakhtigii la dhisay cusbitaalka tiradda dadka ku noolaa Hargaysa lagu qiyaasay kontemeeye kun.Cusbitaalkaasi 1953-kii la dhisay ilaa maanta wax badan laguma kordhin, inkasta oo imika tiradda dadka Hargaysa ku nooli ay milyan qof ku dhawdahay, isla markaana uu yahay dhakhtar qaran oo ay wada isticmaalaan dhamaanba dadka ku nool goboladda dalku” ayuu yidhi wasiirku.
Wuxuu sheegay wasiirku in ay ka wasaarad ahaan ka go’an tahay in ay dib-u-dhis ku sameeyaan cusbitaalka. Waxaanu yidhi “Wasaarad ahaan waxaa naga go’an oo qorshahayagu yahay in la kordhiyo dhismaha cusbitaalka guud ee Hargaysa, in tayadiisana la hagaajiyo, in dhismeyaashiisa la kordhiyo, in laga dhigo cusbitaal hanan karra ama u shaqayn karra dhamaanba shacabka reer Somaliland. Waxaanay wasaaradu muhiimadda koowaad siisay in la kordhiyo dhismeyaasha.
Waxaa loo baahan yahay in la dhiso qaybta gar-gaarka deg-degga ah, oo la hello cid ka jawaabta marka ay dadka gar-gaarka deg-degga ah u baahani la soo xidhiidhaan cusbitaalka. Imika waa qol aad u yar, oo haddii uu tusaale ahaan shil baabuur dhaco oo 15-qof oo dhaawac ah la keenno ma qaadi karro, waana dhisme aad u Duug ah, oo gaaban. Markaa waxaa naga go’an in aanu dhisno meel lagu qaabilo gar-gaarka deg-degga ah, oo heer caalami ah. Waxaanu qoondaynay in loo baahan yahay lacag dhan $50,000 kun oo dollar ah si loogu dhiso, nasiib wanaag ilaa hadda shirkadaha iyo ganacsatadda Somaliland waxaanu ka haynaa lacag gaadhaysa ilaa $160,000 dollar. Miisaaniyadda wax baanu ugu darnay, oo xukuumadu si weyn ayay uga qayb qaadanaysaa dhismaha cusbitaalka”.
Waxaanu intaasi ku daray “Anagoo ka duulayna awoodeena dhaqaale markii la qiimeeyay waxaa ku baxaysa lacag dhan 40milyan oo dollar ah, lacagtaasina mar ma wada heli karno markaa tartiib ayaynu isaga wadanaynaa, laakiin waxaa ka go’an wasaaradda iyo xukuumadaba in loo dedaalo in la tayeeyo adeegyadiisa caafimaad, isla makraana la kordhiyo adeegyadiisa caafimaad. Waxaanu doonaynaa in cusbitaalku uu noqdo mid daboola oo hanan karra baahidda caafimaad ee bulshadeena oo tiradeedu aad u badan tahay”ayuu yidhi Dr Xaglo-toosiye.
Agaasimaha cusbitaalka guud ee Hargaysa Dr. Axmed Xaaji Cumar Askar, oo isna halkaasi hadal ka jeediyay ayaa si weyn ugu mahad naqay labadda shirkadood ee Shaafici iyo Dalsan deeqdan lacageed ee ay ugu deeqeen dhismaha la doonayo in loo dhiso qaybta gar-gaarka deg-degga ah ee cusbitaalka.
Waxaanu ugu baaqay dhamaanba bulshadda guddo iyo dibad-ba in ay ka qayb qaataan dhismaha cusbitaalka guud ee Hargaysa, isagoo agaasimuhu baaq kaasi la mid ahna u diray shirkadaha iyo ganacsatadda kale ee dalka.
By: Khadar Cabdi Muuse
Dawannews Hargeysa office
Home Wararka Dalka Shirkaddo Deeq Lacageed Oo Ay Kaga Qayb Qaadanayaan Dhismaha Cusbitaalka Guud Ku...