Natiijadda Kulan Ay Yeesheen Xisbiyadda Iyo Ergay Ka Socday Dawladda Turkiga Oo Ku Sugan Hargeysa

0
237

Hargeysa(Dawan)-Guddoomiyeyaasha xisbiyadda KULMIYE iyo WADDANI Muuse Biixi Cabdi iyo Cabdiraxmaan Maxamed Cabdilaahi (Cirro) ayaa shalay kulan la yeeshay ergayga dawladda Turkiga u qaabilsan wada hadallada u dhaxeeya Somaliland iyo Soomaaliya oo la yidhaahdo Ahmet Rize Demirer.
Kulankan waxa ka soo baxay dhawr qoddob oo Hoggaamiyeyaasha xisbiyadda iyo dawladda Turkigu isku waafaqeen, sida lagu sheegay war-saxaafadeed ka soo baxay xafiiska warbaahinta ee xisbul xaakimka KULMIYE oo u dhignaa sidan:-
 
“Madaxda Axsaabta Qaranka Jamhuuriyadda Somaliland, ayaa kulan la yeeshay Ergayga gaarka ah ee dawladda Turkiga u qaabilsan wadahadalka Somaliland iyo Soomaaliya Ambassador Ahmet Rize Demirer, kulankaas oo ka dhacay xarunta Qunsuliyadda guud ee Turkigu ku leeyahay caasimadda Jamhuuriyadda Somaliland ee Hargeysa gelinkii dambe ee shalay oo taariikhdu tahay 27 November 2015.
Kulanka labada dhinac dhexmaray waxa goob-joog ka ahaa Guddoomiyaha  Xisbiga tallada Somaliland haya ee KULMIYE, ahna murrashaxa madaxweynaha xisbiga Md. Muuse Biixi Cabdi iyo Guddoomiyaha xisbiga mucaaridka ah ee WADDANI, ahna Guddoomiyaha Golaha Wakiillada Jamhuuriyadda Somaliland Md. Cabdiraxmaan Maxamed Cabdillaahi (Cirro) oo ay wehelinaysay marwo Faadumo Siciid, halka dhinaca dalka Turkiga-na ay ka socdeen Ergayga gaarka ah ee dawladda Turkiga u qaabilsan wadahadalka Somaliland iyo Soomaaliya Ambassador Ahmet Rize Demirer, Qunsulka Guud ee Turkiga u jooga Hargeysa Mr. Muzaffer Yükseliyo madax kale.
Madaxda Axsaabta Somaliland, gaar ahaan xisbiyada KULMIYE iyo WADDANI, kulanka ay la yeesheen diblomaasiyiinta ka socday dawladda Turkiga, waxa lagaga hadlay sii xoojinta cilaaqaadka siyaasadeed, dhaqaale, ganacsi, isu socodka dadweynaha iyo saaxiibtinimo ee u dhexeeya dalalka Somaliland iyo Turkiga, iyadoo sidoo kale si gaar ah looga wada-xaajooday  wadahadallada Somaliland iyo Soomaaliya.
Arrimaha Masuuliyiinta labada xisbi ee KULMIYE iyo WADDANI ay kala hadleen ergayga Turkiga, soona jeediyeen, waxa ugu muhiimsanaa qoddobo ay ka mid ahaayeen;
ü In wadahadallada Somaliland iyo Soomaaliya noqdaan qaar natiijo midho-dhal ahi ka soo baxdo
ü In  dawladda Turkigu dhex u noqoto arrimaha Somaliland iyo Soomaaliya ee dhinacyada;

  • Mucaawanada ama dhaqaalaha oo ay u arkaan in si sad-bursiimo ah Soomaaliya u hesho
  • Arrimaha Siyaasadda
  • Dhexdhexaadinta wadahadalka u dhexeeya labada dal ee Somaliland iyo Soomaaliya

ü In intii ay socdeen wadahadalka Somaliland iyo Soomaaliya, wixii lagu heshiiyey ay ka fuli waayeen dhinaca Muqdisho, taasina caqabad ku tahay wadahadalka gogoshiisa ay dhigtay dawladda Turkigu
ü Waxa kaloo labada xisbi u caddeeyeen Ergayga Turkiga in mowqifkooda wadahadalladu yahay inay ka soo baxdo madaxbannaanida Qarannimada Somaliland, isla markaana aanay wax ka sokeeya marnaba aqbalayn.
Dhinaca kale, Ergayga gaarka ah ee Turkiga u qaabilsan wadahadalka Somaliland iyo Soomaaliya iyo dublomaasiyiinta kale ee wehelinayey waxay u mahadceliyeen madaxda axsaabta qaranka ee Jamhuuriyadda Somaliland, waxaanay ballanqaadeen;
v In dawladda Turkigu ay dhexdhexaad ka noqonayaan arrimaha u dhexeeya Somaliland iyo Soomaaliya
v In Dawladda Turkigu ay ballaadhinayso qunsuliyadooda Hargeysa oo ay diyaar u yihiin inay wax badan ka qabato tabashooyinka Somaliland qabto, una raadiyaan xal u cuntama reer Somaliland
v In Turkiga iyo Somaliland yeeshaan xidhiidh wanaagsan oo sii socda.”
Dawannews Hargeysa office

Leave a Reply