By: Khadar M.Dhako
Hargaysa (Dawan):- Xildhibaan Saleebaan Cawad Cali (Bukhaari), oo ka mid ah mudaneyaasha Golaha Wakiiladda Somaliland, ayaa si adag uga jawaabay hadalo ka soo yeedhay afhayeenka xisbiga WADDANI xildhibaan Ibraahim Mahdi Buubaa oo hore u naqdiyay safarkii guddoomiyaha xisbiga KULMIYE Muuse Biixi Cabdi iyo xubno golaha wasiirrada ahi ku tageen gobalada Saaxil, Togdheer iyo Daad-madheedh.
Waxaanu sheegay in xisbiga WADDANI ay ka qalbi jabeen taageerada uu xisbiga KULMIYE haysto, is la markaana uu xisbiga KULMIYE yahay mid aan la muquunin karin oo aanay u babac dhigi karin xisbiyadda mucaaradku. Xildhibaan Bukhaari waxa uu sidaasi shalay isagoo u warramayay wargeyska DAWAN.
“Waxaan maqlayay afhayeenka xisbiga WADDANI Ibraahim Mahdi Buubaa oo ka qaylinayay socdaalkii Guddoomiye Muuse Biixi ku tegay gobalka Togdheer si uu dadka reer Togdheer ugu buraarujiyo qaadashadda diiwaan-gelinta codbixiyeyaasha ee ka socota gobalka Togdheer. Waxaan leeyahay Soomaalidu waxay ku maah-mahdaa Lay-ligu biyaha kashkiisa ku jira ayuu ka didaa, WADDANI waxa ay ka qalinayaan oo ay arkeen taageerayaashii xisbiga KULMIYE oo muujiyay in ay yihiin cudud aan la maquunin karin taageero buuxdana xisbiga KULMIYE ka haysto gobalada dalka iyo gobolka Togdheer,”ayuu yidhi Xildhibaan Saleebaan Bukhaari.
Xildhibaan Bukhaari waxa uu WADDANI u soo jeediyay inuu ku mashquulo sidii uu u kasban lahaa kaadiriinta ka dareeraysa, waxaanu yidhi “Markaa waa baqdin iyo didmo gashay oo awalba ku dareensanaan in taageerayaashoodu xadidan yihiin ama kooban yihiin xisbiga WADDANI taas ayaa ka dhawaajisay. Markaa xisbiga WADDANI waxa aan leeyahay maalin walba waa laga dareerayaa, waxaana ay sheegaan wax xisbiga lagu xanto, markaa waxaan leeyahay WADDANI is hagaaji oo ku mashquul hawsha kuu taal ee KULMIYE oo tagay oo tallaabsaday ha ku dabo lumin.”
Xildhibaan Bukhaari waxa kale oo uu sheegay in aanay jirin lacag xukuumadu ku bixisay socdaalkii Guddoomiye Muuse Biixi. “Hanti lagu bixiyay socdaalkaa guddoomiyaha KULMIYE ku tagay gobalka Togdheer ma jirto loomana baahna xisbigu, isagaa isku filan oo waxa uu iska ururiyo ayuu ku shaqeeyaa xeer ayuu leeeyahay taageerayaashii soo dhaweeyay weftigii guddoomiyaha KULMIYE ayuun bay la qalbi jabeen WADDANI waa kuwii cabaadayay baqdin ayuun baan u arkaa waxaan leeyahay is-xejiya.”
Xildhibaanku waxa uu tilmaamay in ay isku fikrad yihiin Mahdi Buubaa iyo adeerkii Ismaaciil Buubaa, “Ismaaciil Buubaa waa oday weyn oo siyaasiya oo reer Somaliland ah, warkiisana waa laga dheragsan yahay, waxaana uu iskugu keen sheegay in uu siyaasada ka baxay oo uu Hargeysa iska joogayo, waxaan se is leeyahay markaan arkay hadalkii Ibraahim Buubaa wax kaga sheegayay Cawil waxa aan u qaatay in uu Ismaaciil nastay, markii uu ogaaday mid yar oo galaalan oo xaafada ah oo fikirkiisii qaadi kara in uu dhashay oo uu ku hubsaday in uu hawshaa qaadi karo ayuun buu nastay, waxaanan leeyahay wax nasiya ayuu helay,”ayuu yidhi Xildhibaan Bukhaari.