Ceerigaabo (Dawan): Wasaaradda cadaaladda Somaliland ayaa shalay qalab ka xafiisyadda ku wareejisay maxkamadda gobolka Sanaag, qalabkaasi oo isugu jiray kombuyuutarro, kuraas, miisas iyo qalab kale, waxaana lagu wareejiyay guddoomiyaha maxkamadda racfaanka ee gobolka Sanaag.
Isu-duwaha wasaaradda cadaaladda ee gobolka Sanaag, oo qalabkaasi ku wareejiyay guddoomiyaha maxkamadda racfaanka ee Sanaag, oo ka warbixiyay qaybaha uu ka kooban yahay qalabkaasi. Waxaanu yidhi “Qalabkani wuxuu ka kooban yahay 8-kursi, 12 miis, 3 qasnadood oo loogu tallo galay in lagu xafido waraaqaha iyo waxyaabaha kale ee xafiisyadu leeyihiin. 3 kombuyuutar, 3 printer iyo 3 photo copy.”
Sidoo kale waxaa isna halkaasi ka hadlay guddoomiyaha maxkamadda racfaanka ee gobolka Sanaag, oo isagu qalabkaasi kala wareegay isu-duwaha, waxaanu sheegay in ay baahi weyn u qabeen qalabkani, isla markaana ay hadda kaga maarmi doonaan baahidii ay markii hore qabeen.
“Haddii aanu nahay bahda gar-soorka gobolka Sanaag baahi aad iyo aad u weyn ayaanu u qabnay qalabkani, waxaananu aad iyo aad ugu mahad naqaynaa wasaaradda cadaaladda, wasiirka, wasiir ku xigeenka iyo agaasimaha guud. Waxa kale oo aanu u mahad celinaynaa isu-duwaha wasaaradda cadaaladda ee gobolka Sanaag, oo qalabkani nagu wareejiyay” ayuu yidhi guddoomiyaha maxkamadda racfaanka ee gobolka Sanaag.
Dhinaca kale badhasaabka gobolka Sanaag Axmed Cabdi Falaay, ayaa shalay xilalkii u kala wareejiyay badhasaab ku xigeekii hore ee gobolkaasi Ismaaciil Cabdi Xasan iyo badhasaab ku xigeenka cusub Naaleeye Axmed Sheekh Jaamac.
Waxaana munaasibadaasi xil wareejinta ka soo qayb galay masuuliyiinta heer gobol iyo heer degmo ee gobolka Sanaag, salaadiin, cuqaal, dhalinyarro, aqoon yahanno iyo marti sharaf kale.
Dawannews Hargeysa office
