Hargeysa(Dawan): Wasiirka Wasaaradda Warfaafinta, dhaqanka iyo wacyigelinta jamhuuriyadda Somaliland Cismaan Cabdilaahi Saxardiid (Caddaani), ayaa ka hadlay arrimo uu ku tilmaamay amni-darro oo lagu jebiyey xafiiska khasnejiga TV-ga Qaranka iyo warar uu sheegay in ay been abuur yihiin oo laga qoray wasaaradda.
Wasiir Cadaani oo shalay shir jaraa’id ku qabtay xafiiskiisa waxa kale oo uu ka hadlay warar sheegayay in uu jiro Khlilaaf ka dhexeeya isaga iyo wasiir ku xigeenkiisa iyo is-bedelo horumarineed oo uu sheegay in ay ku samaynayaan waaxyaha kala duwan ee Wasaaradda.
Wasiir Cadaani, ayaa ugu horayn waxa uu ka hadlay Falka amnidarada ah ee uu sheegay in uu gudaha wasaaradda ka dhacay, kaasi oo sida uu sheegay lagu jabsaday xafiiska khasnejiga TV-ga qaranka isagoo xusay in uu socda baadhitaan arrintaasi ay ku wadaan ciidamadda boolisku.
Waxaanu yidhi “Xalay (habeen hore), waxaa wasaaradda Warfaafinta, Dhaqanka iyo Wacyigelinta gudaheedda ka dhacay fal dembi ah oo lagu jabsaday xafiiska khassnajiga TV-ga Qaranka, markii aan subaxnimadii shaqada soo galay, waxaan u imid xafiiskaas oo jaban oo ay Innantii ku shaqaynaysay qaylinayso, oo leedahay xafiiskii baa la iga jabsaday oo 5.900.000 laga qaatay, warbixintaa markay na siisay waxaanu u yeedhnay taliyaha Booliska, waxaananu ku wargelinay ciidanka baadhista dembiyada, waxaana socda baadhitaan ku aaddan falkaasi.”
Waxa kale oo uu wasiirku beeniyey warar sheegayay in mudadii uu wasaaradda joogay uu is-taagay barnaamijkii tooska ahaa ee Telefishinka Qaranka, isagoo wararkaasi ku sheegay in ay yihiin kuwo la been abuuray oo aanay waxba ka jirin. “Waxaan moodayey in warbaahinta oo dhami ay ogayd in wixii aanu isla qaadanay ay ahayd in la hubiyo sugnaanshaha warka la baahinayo, laba maalmood waxaa shebekadaha qaarkood lagu baahinayey in intii aan wasaaradda joogay uu istaagay barnaamijkii Tooska loo baahin jiray ee TV-ga qaranku, waa war aan waxba ka jirin.
Barnaamijkaasi waxa uu istaagay 24 bishii November ee sanadkii ina dhaafay, anna halkan (Wasaaradda) waxaan joogay muddo saddex todobaad ah, mudadaana waan ka shaqeeyey sidii barnaamijkaa dib loogu hagaajin lahaa, aniga oo agaasimihii farsamada ee wasaaradda u diray dalka Thailand si arrinkaa deg-deg loogu hagaajiyo, waxaanan sii daayey kharashkii ku baxayay”ayuu yidhi wasiirka warfaafinta.
Dhinaca kael, Md Caddaani waxa kale oo uu ka hadlay warar uu been abuur ku tilmaamay oo lagu sheegay in khilaaf uu ka dhexeeyo isaga iyo wasiir ku xigeenkiisa Marwo Shukri Xariir Ismaaciil. Waxanu ku sifeeyey wararka noocaas ah kuwo ay wasaaraddu hore u caadaysatay laakiin aan xiligan jirin, meel laga keenayna aanu garanayn.
Wasiirka warfaafintu waxa uu tilmaamay qorshayaasha isbedel ee uu ku hawlanaa mudadii koobnayd ee uu Wasaaradda joogay sida tayaynta waaxyaha baahinta, wacyigelinta iyo dhaqanka, oo ay soo raacaan adkaynta amniga xarunta Wasaaradda iyo ku ilaalinta shaqaalaha xiliyada shaqada iyo kaltankeeda.
“Waxaan doonaynaa in Radio Hargeisa, Tv-ga Qaranka iyo wargaysyada Dawan ay noqdaan kuwa ugu horeeya warbaahinta Af-ka Soomaaliga ku hadasha. Waxaa noo qorshe ah in Wakaaladda wararka aanu ka dhigno mid caalami ah, oo guud ahaan warbaahinteenna iyo Warbaahinta caalamiga ahba u noqota il-wareed ay xogta ka helaan. Waxaanu ahmiyadda siinnay in la adkeeyo amniga xeradda wasaaradda oo shaqada ka dhex socotaa muhiimad weyn u leedahay Qaranka. Waxaa naga go’an in aanu is-bedel muuqda ku samayno waaxyaha kale ee Dhaqanka iyo Wacyigelinta,”ayuu yidhi Wasiir Caddaani.
Agaasimaha Guud ee wasaaradda Warfaafinta Maxamed Cilmi Aadan (Ilkacase), oo isna shir jaraa’idkaasi kelmad ka jeediyey waxa uu sheegay inay isbedelada wasaaradda ee wasiirku hormuudka ugu yahay ay sii soconayaan, sidoo kalena la sii wadayo qorshaha kaltanka shaqada iyo shaqaalaha, waxa laga wada shaqaynayo ee laga wada tashanayaana ay tahay dantii Qaranka.
Dawannews Hargeysa office