Hargaysa (Dawan): Guddoomiyaha golaha dhexe ee xisbiga Kulmiye Jaamac Ismaaciil Cige (Jaamac- Shabeel), ayaa beeniyay in xildhibaanadda golaha Wakiiladda ee xisbiga Kulmiye ay wadaan mooshin xilka lagaga qaadayo guddoomiye Cirro oo dhawaan lagu eedeeyay inuu ku kacay musuq-maasuq.
Jaamac Shabeel oo shalay u waramayay Aadan Cabdi Ciidle oo ka tirsan telefishanka Horn Cable oo wax ka waydiiyay wararka sheegaya in xilka laga qaadayo guddoomiye Cirro waxa uu ku jawaabay, “Warkaa mooshinka ah ma hayo anigu, baarlamaanka ayaana ku shaqo leh oo haddii uu dambi galo guddoomiyaha golaha Wakiiladu baarlamaanka ayay u taalaa inay ku qaadaan dambiga uu galay, laakiin anga xisbi ahaan hawl noo taala ma aha”ayuu yidhi Jaamac Shabeel.
Jaamac Shabeel waxa kale oo uu naqdiyay qaar ka mid ah salaadiinta Somaliland oo uu sheegay in ay ku dhex milmeen siyaasadda oo aan shaqadooda ahayn. Waxaanu yidhi “Salaadiintu iyaga xadkoodii ka soo talaabay, qofku marka uu galo wax aan shaqadiisa ahayn oo uu ku meeraysto, waxaan ka farxin ayaa yimaada. Suldaanku waa inuu ogaado in dadkiisu saddexda xisbi ku kala jiraan, haddii uu mid weeraro dadkii xisbigaa ahaa way ka xanaaqayaan”.
Guddoomiyaha golaha dhexe ee xisbiga Kulmiye, ayaa ugu hanjabay salaadiinta in haddii ay ku ekaan waayaan xayn-daabka dhaqanka oo ay ku soo xad-gudbaan siyaasadda in ay ciqaab kala kulmi doonaan.
Waxaanu yidhi “Kalsoonidiina wuu luminayaa, suldaanku wuu dab-ran yahay ismana oga salaadiintu inay dab-ran yihiin, xagan Sacad Muuse uun kama jirto dhibaatada saldanadu leedahay ee meel walba way ka jirtaa. Suldaanka dhaqankii ilaaliya mise ka lugta soo geliya siyaasadda, cadaabaha ayay ka waraabinaysaa, mana naxdo. Markaa waxaan ku baraarujin lahaa salaadiinta inay ka fogaadaan siyaasadda, suldaankuna waa in uu ogaado inay siyaasadu tahay shayga wax burburiya ee ugu adag”.
Dawannews Hargeysa office
