Ceerigaabo (Dawan)- Wasiirka Wasaaradda degaanka iyo horumarinta reer miyga Somaliland Jamhuuriyadda Somaliland, marwo Shukri Xaaji Ismaaciil Baandare, ayaa ka hadashay warar maalmihii la soo dhaafay soo baxay oo sheegayay in wasaaradda degaanku soo saartay wareegto lagu joojinayo dhoofinta Fooxa iyo Beeyadda.
Kuwaasi oo wasaaradda degaanka ku eedeeyeen qaar ka mid ah dadka ka shaqaysa Fooxa iyo Xabkaha oo saxaafadda la hadlay in wasaaradu ay wado qorshe ay ku doonayso in ganacsato gaar ah loo xidho dhoofinta Xabkaha iyo Fooxa.Hase yeeshee Wasir Shukri Baandare, waxay sheegtay in aanay waxba ka jirin arrintaasi, balse ay ku dedaalayaan sidii loo ilaalin lahaa daryeelka dhirta laga jafo Beeyadda iyo Fooxa si aanay u dabar-gu’in.
Wasiirka oo safar shaqo ku maraysa degaanno ka mid ah gobolka Sanaag, oo isla markaana ay wehelinayaan masuuliyiin ka tirsan wasaaradaasi oo warbaahinta kula hadashay degmadda Ceel-Afweyn ayaa faah-faahin ka bixisay ujeeddada socdaalkeedda.
Waxa kaloo ay sheegtay socdaalkoodu uu la xidhiidho xog ogaal u noqoshadda xaaladda abaareed ee gobolladaasi ka taagan iyo sidii ay kulamo ula yeelan lahayd dadka ka shaqaysta Xabkaha iyo Beeyadda.
“Ujeeddada socdaalkayagu waa laba arrimood. Mida hore waa xaaladda abaaraha iyo sida dhulku yahay in aan indho-indhayno, sababtoo ah waxaan ka mid ahay wasiirrada ku jira guddiga abaaraha heer qaran. Markaa socdaalkaygu wuxuu ku wajahan yahay in aan xaaladda dadka ee degaamadda aan soo eego.
Ta labaad waxaannu booqanaynaa Ceerigaabo, iyo dhulka ay Beeyadu ka baxdo. ujeeddadayadu waxa weeye sidii degaanka, dalka iyo dadkaba wax loo tari lahaa, wixii imika yaalana loo ilaalin lahaa,”ayay tidhi Wasiirka Degaanku.
Geesta kale, Wasiir Shukri Baandare, oo wax laga waydiiyay cabashadda dadka ka shaqaysta Foox iyo Beeyadda ee la xidhiidha in hakad la geliyay dhoofinta Xabkaha iyo Fooxa, waxay ku jawaabtay, “Sidee ayaa loo joojiyaa, oo yaa inNaga joojinaya Beeyadda, ciddina innaga joojin mayso. Waxay ku xidhan tahay uun geedka oo aynu ilaashanno.
Wakhtigani ma aha, wakhtigii dhirta la korayay, laakiin Beeyadda dhoofkeedda ayaa joojinaya? Haddii aynaan innagu iska joojin, ciddina inaga joojin mayso.”
Dhinaca kale dadka ka ganacsatadda Xabkaha iyo Fooxa ee gobolka Sanaag ayaa ku eedeeyay wasaaradda degaanka in ay soo saartay go’aan lagu hakinayo dhoofinta fooxa.
Iyagoo ay tilmaamay in wasaaradda degaanku ay ganacsato ajaanib ah muddo shan sannadood ah ka kiraysay ama qandaraas ku siisay dhoofinta Beeyadda iyo Fooxa.
Dawannews Hargeysa office