Xidhitaanka Madaxa Shirkadda Samsung

0
223

Lee Jae-yong oo ah madaxa shirkadda Samsung ayaa lagu xidhay dalka Kuuriyada Koonfureed isaga oo loo haysto laaluush iyo eedaymo kale.

Arrintan ayaa lala xidhiidhiyay fadeexaddii horseeday in xilka laga xayuubiyo Park Geung-hye.

Samsung ayaa lagu eedeeyay in ay deeq siisay mu’sasado aan faa’iido doon ahayn oo ay maamusho Choi Soon-sil,oo ay saaxiibo yihiin madaxweynihii hore Park, arrintaas oo ay shirkaddu ku badalanaysay in ay gacan ka hesho dawladda.

Lee iyo shirkadda Samsung Group labaduba way diideen in ay wax gaf ah gaysteen.

Lee oo si ku meel gaadh ah u ah madaxa shirkadda Samsung ayay markii koowaad dacwad oogeyaashu su’aalo waydiiyeen bishii koowaad balse waxay go’aansadeen in aysan xidhin.

Laakiin todobaadkan horaantiisii ayay mar kale su’aaalo waydiiyeen.

Jimcihii ayay maxkamaddu sheegtay in ay mihiim tahay in la xidho Lee Jae-Yong ka dib markii dacwaddiisa lagu soo kordhiyay falal dambiyeedyo cusub iyo cadaymo horleh oo la helay.

Dacwad oogeyaasha ayaa hawshiisa sii baadhi doona 20 maalmood si ay dacwad rasmi ah ugu soo oogaan.

Xidhitaankiisu kama dhigna aragtida maxkamadda oo dambiile ama dambilaawe ah balse waxay ka dhigan tahay in ay dambigan u aragto mid khatar ah.

 

Leave a Reply