London (Dawan)- Gudoomiyaha maxkamadda sare ee Somaliland, Aadan Xaaji Cali Axmed, ayaa ka hadlay dambiga loo haysta wariye Cabdimaalik Muuse Coldoon, waxaanu sheegay inaanu la xidhiidhin safarkii uu ku tagey Xamar iyo cid buu jeclaaday ee uu yahay dambi qaran iyo kicin dadweyne.
Aadan Xaaji Cali Axmed, waxa uu sheegay in ay maxkamada horteeda kaga caddaatay weriye Coldoon in uu ku kacay falal ka dhan ah qaranimada Somaliland iyo waddamada la jaarka ah, taas oo maxkamada gobalka Hargaysa ay ku xukundtay xadhig muddo labo sanno ah dhawaan.
Aadan Xaaji Cali oo safar ku jooga magaalada London ee dalka UK, ayaa tilmaamay in Coldoon lagu soo ee deeyay dacwad la xidhiidhi in uu kicinayay dadka oo uu ku dhiiri galinayay in ay ka horyimaadaan qaranimada Somaliland, waxaana uu xusay in la soo bandhigay cadaymo muujinaya in uu dambigaas ku kacay, isla markaana kiiskiisu aanu la xidhiidhin arimaha saxaafada iyo safarkii uu ku tagay magaalada Muqdisho ee dalka Soomaaliya.
“Annagu haddaanu nahay garsoorka, dadka dhex ayaanu u nahay, Coldoon booliska ayaa ee deeyay intaan halkan (UK) joogay ayaa la soo ee deeyay, laguma soo eedayn dambi saxaafada la xidhiidha ee waxaa lagu soo ee deeyay in uu qaranimada ka soo hor jeedsaday, maxkamad furan ayaana kiiskiisa dhagaysanayay, wuuna is difaacay, waxaana la soo bandhigay wixii cadaymo ahaa ee loo haystay, muqaalana waa la soo bandhigay,”ayuu yidhi Guddoomiyuhu, waxaanu intaas ku daray;
“Lagumana haysto Muqdisho ayuu tagay ee waxa lagu soo ee deeyay in uu waday abaabul oo uu dadka ku dhiiri galinayay in ay qaranimada ka hor yimaadaan oo uu dadka ku kicinayay wadamada la jaarka ah Somaliland, markaa kiiskii maxkamadda la hor keenay may ahayn Muqdisho, maxkamaduna booliska waxa ay ku tidhi caddeeya dambiga loo haysto, dhawr looyar ayaana difaacayay,” ayuu yidhi Guddoomiye Aadan Xaaji Cali oo waramayay Telefiishanka HCTV, waxaanu intaa ku daray; “Waxaa garsoore ka ahaa dacwadaa guddoomiyaha maxkamada gobalka Hargaysa, ma.daama dacwadu ahayd mid xaasaasiya, dhinac kasta wuu ka eegay, caddaymihii ayuu dhagaystay, waxaana lagu soo ee deeyay dambi ka dhana qaranimada Jamhuuriyadda Somaliland, waana lagu helay dambigaas, maxkamadiisuna may dhamaan, haddii aanu ku qanacsanan rafcaan ayaa u furan, maxkamadda heerka labaad ee Hargaysa ayuu rafcaan ka qaadanayaa.”
Dawannews Hargeysa office