Hargaysa (Dawan)- Gar-yaqaanka guud ee Somaliland Cabdisemad Cumar Maal, ayaa sheegay in aanay jirin guddi culimo ah oo uu magacaabay madaxweynaha Somaliland, hase yeeshee uu madaxweynuhu u xushay xubno gudi ah oo golaha Guurtidda u gudbin doona gudidda culimadda.
Cabdisamad Cumar Maal oo shalay warbaahinta kula hadlay magaaladda Hargaysa waxa uu sheegay in madaxweyne Siilaanyo u xushay guddi ka kooban xukuumadda iyo golaha Guurtidda, kuwaas oo golaha Guurtida u gudbin doona gudidda culimada. Waxaanu gef iyo meel-ka-dhac ku tilmaamay hadalo ka soo yeedhay guddoomiyaha guddida qareenada Somaliland oo qayrul dastuuri ku tilmaamay gudi culimo ah oo xukuumaddu magacawday.Isagoo u soo jeediyay guddoomiyaha ururka qareenada in uu ka waan toobo waxyaabaha aan jirin ee uu ku hadlay.
Gar-yaqaanka guud oo arrimahaasi ka hadlayayna waxa uu yidhi “Waxaan ka jawaabayaa hadal ka soo yeedhay guddoomiyaha gidida qareenada Somaliland oo qayrul dastuuri ku sheegay guddi culimo ah oo xukuumaddu magacawday, mana jirto gudi culimo ah oo uu magacabay madaxweynaha Somaliland.
Aniga ayaa ah gar-yaqaanka guud ee qaranka, waana wax ku soo baxa faafinta guud. Gudida la macaabayna wax ka xidhan saxaafada ma aha, waxaana ugu danbaysay wax la magacaabay wakaalada beenyada.
Nidaamka loo magacaabayna dastuurka ayaa sheegaya, waxaana xeeriya lix qodob oo dastuurka ku jira, waana wax iska cad oo qof waliba fahmi karo nidaamka loo magacaabayo”.
“Waxa jirtay guddi madaxweynuhu u soo xushay in golaha Guurtida u gudbiyaan gudida culimada sida uu sheegayo qodobka boqol iyo sagaal iyo toban (119) ee dastuurka.
Gudidda culimada waxa xulaya guddi ka kooban xukuumadda iyo golaha Guurtida oo tiro is-le’ega ah, gudidaas ayaa u gudbinaysa golaha Guurtida gudida culimada.
Golaha Guurtida ayaana ansixinta iska leh oo soo saaraya, laakiin wax madaxweynuhu magacaabay ma jirto,” ayuu yidhi gar-yaqaanka guud.
Cabdisamad Cumar Maal, waxa uu tilmaamay in madaxweyne Siilaanyo u xushay in ay gudida culimada soo magacaabaan laba guddi oo ka kooban xukuumadda iyo golaha Guurtida.
“Waxaa madaxweynuhu u xushay in ay soo magacaabaan gudida culimada guddi ka kooban laba wasiir iyo laba xildhibaan oo ka tirsan golaha Guurtida, isagoo adeegsanaya qodobka dastuurka ee 119 faqradiisa koowaad oo dhigaya in gudida culimada ay soo xulayaan xubno ka kooban xukuumada iyo golaha Guurtida.
Cidda magacaabaysa guddida culimada madaxweynaha ma aha, markaa ma aha in qof aan waxba hubsan oo ah kii u mudnaa in uu dastuurka ilaaliyo in uu ku tilmaamo in uu madaxweynuhu dastuurka jebiyay, taasina waa gef,” ayuu yidhi Cabdisemad Cumar Maal.
Dawannews Hargeysa office