Hargeysa (Dawan)- Wasiirka Wasaaradda Dhalinyarada iyo Ciyaaraha Jamhuuriyadda Somaliland, Mudane Cabdirisaaq Waabari Rooble, ayaa sheegay inay Somaliland ku martiqaadeen wefti uu hoggaaminayo Wasiirka Ciyaaraha Jamhuuriyadda Jabuuti isla markaana labada waddan wadajir u samaysan doonaan guddiyo ka shaqeeya horumarinta noocyada ciyaaraha kala duwan.
Wasiirka oo shirjaraa’id ku qabtay xafiiskiisa shalay, waxa kaloo uu ka hadlay hindiseyaal ay doonayaan inay cilaaqaad kula yeeshaan waddamada iyo xidhiidhada bariga afrika, waxaannu shuruud ku xidhay iskaashi dhexmara xidhiidhada ciyaaraha Somaliland iyo Soomaaliya.
“Waxaa dhawaan noo qorsheysay oo aanu rajeynaynaa inuu qabanno tartan ciyaaraha fudud, kuwaasi oo aanu doonayno inaanu soo saaro Orod-yahanno magacoodu meelmaro, xidhiidhka waddamada bariga Afrika aannu la leenahayna meel wanaagsan ayuu marayaa. waxaannu booqanay dalka Jabuuti waxaanan la kulanay madaxda ugu sarsareysa waanu wada hadalay, waxaannu casuumad u fidinay oo Somaliland noogu iman doona Wasiirka Ciyaaraha ee Jabuuti oo booqasho rasmi ah ku imanaya dalka.,”ayuu yidhi Wasiirka Ciyaaruhu.
Waxa kaloo uu sharraxay qorsheyaal doonayaan inay ku horumariyaan ciyaaraha, waxaannu yidhi; “Waxaannu soo saari doona guddi labada dal ka kooban oo hawlaha ciyaaraha ka wada shaqeeya si ay u sii xoogeysato wada shaqeynta labada dal ka dhaxeysaa, sidoo kale waxaannu rajeynayna in aanu xidhiidh noocan oo kale ah aanu la samayno dalka Itoobiya, dhallinyaradana guulba uga soo hoyan doonta dedaaladan. Waxa kaloo noo qorsheysan inaanu iskaashanno dalalka bariga Afrika haddii dhallinyaradu xataa magaca waddankeenna ay ku ordi waayaan in magac dal kale ay ku ordaan si ay caan u noqdaan sida Moha Farah oo u orda waddanka Ingiriiska laakiin Somalilander ah, waana fikirka aanu doonayno in aanu ciyaaraha ku horumarino.”
Wasiirku waxa uu sheegay inaanay xidhiidhada ciyaaraha ee Soomaaliya aanay yeelaynin wax iskaashi ah inta ay qirayaan madax-bannaanida Somaliland, waxaannu yidhi; “Soomaaliya wax xidhiidha oo aanu la leenahay ma jiro, waayo meel aanu kala xidhiidhnaba ma garaneyno Soomaaliya waxaannu ka rabnaa inay tidhaahdo Somaliland waa dal xora madaxbannaan marka eraygan laga helo ayaa xidhiidhku furmi doonaa.”
Wasiir Cabdirisaaq oo hadalkiisa sii watay wuxuu intaas ku daray; “Wasaaradda dhallinyarada iyo ciyaaruhu waa wasaarad ballaadhan qarankanna qiimo weyn ugu fadhida, waxaana hoos yimaada dhallinyartii oo ah dadka ugu badan ee qaranka Somaliland boqolkiiba todobaatan lagu tilmaamo, wax badan oo noo qorsheyna noomay suuragalin oo xaaladii adkayd ee abaareed waddanka soo martay ayaa hakisay, haddana hawlahayagu way socdeen oo waanu shaqeynaynay, waxaannu sannadkan aad ugu mashquuley inaanu dejino siyaasad aanu aad uga dheeganey oo dibna aanu u habaynay una hagaajiney qarankeenna waxa muhiim u ah in dhallinyarada loo diyaariyo meelo ay ku ciyaaran hadday tahay kubbadaha cagta, kollayga iyo ciyaaraha fudud.”
Dawannews Hargeysa office