Qore Faysal Xiis Weerar (Afgaab)
Hargeysa (Dawan) Wasiirka wasaaradda isgaadhsiinta iyo teknoolojiyadda Somaliland, Dr. Cabdiweli Sheekh Cabdillaahi Suufi Jibriil, ayaa soo saaray wareegto lagu maamulayo hirarka muuq baahiyayaasha Cable Tv-yada islamarkaana lagu farayo in ay u hogaansamaan shuruucda maamulka hirarka.
Wasiirka ayaa wareegtadiisa ku sheegay in la dhaqan gelinayo hannaanka maamulida hirarka Tv-yada, islamarkaana looga baahan yahay Tv-yada Cable-ka ah ee leh Recieverada la daawado tiro cayiman iyo in ay mar labaad is diwaangeliyaan.
Wareegtada wasiirka wasaaradda isgaadhsiinta iyo teknoolajiyadda ayaa u dhigneyd sidan :
“1 In Shirkadaha bixiya adeegga muuq-baahiyaha ee loo yaqaano (Cable Tv) ay adeegsan karaan ugu badnaan lix (6) Kanaal (Channel) oo hirarka UHF-ka ah.
2 In dhammaan shirkadaha bixiya adeegga kor ku xusani in dib u soo codsadaan diwaangelinta hirarka ay imika adeegsadaan muddo saddex bilood gudahood ah.
3 . In shirkadaha bixiya adeegga kor ku xusani u hoggaansamaan xeerarka, habraacyda iyo tilmaamaha wasaaraddu soo saarto ee la xidhiidha nooca awoodda iyo tayada qalabka baahinta iyo horumarinta farsada casriga ah.
4 . In wasaaradda iyo shirkaduhu ka wada shaqeeyaan habsami u adeegsiga hirarka isgaadhsiineed ee la xidhiidha adeegga muuqbaahiyaha iyo farsamada lalinta”
Wakhtiga ay ku hirgelayaan qodobada wareegtadani waa muddo saddex bilood ah.