Addisababa (Dawan)- Mareeyaha Hay,ada Duulista iyo Madaarada Somaliland Cumar-Sayid Cabdilaahi Aadan oo socdaal shaqo ku jooga wadanka Itoobiya ayaa kulan la qaatay Agaasimaha guud ee Hay,ada duulimaadyada rayidka ee itoobiya (Ethiopian Civil Aviation Authority- ECAA -) Mr Gethachaw Mengiste.
Kulankaas oo ka dhacay xarunta guud ee Hay,adaas ay ku leedahay Magaalada Addis ababa labada Masuul ayaa ka wadahadlay arimaha duulimaadyada labada wadan, nabad galyada, tababarada shaqaalaha iyo sidii iskaashi buuxa loo yeelan lahaa mustaqbalka.
Labada masuul waxay isku af garteen in la sii xoojiyo xidhiidhka taariikhiga ah ee ka dhaxeeya labada dal ee Somaliland iyo Itoobiya iyo guud labada hay,adood ee duulimaadyada ee labada wadan,iyada oo la is dhaafsanayo iskaashi , tababaro, iyo wixii kale ee khibrad la wadaagi karo.
Agaasimaha guud ee Hay,ada Duulimaadyada Itoobiya Gethachew Mingistu ayaa uga mahad celiyay dhigiisa Somaliland Booqashada uu ku yimid wadanka itoobiya isaga oo ugu hambalyeeyay shaqaalaha Somaliland ee ay ka qalin jabiyay machadka barashada duulimaadyada itoobiya.