Hargeysa (Dawan) Madaxweynaha Somaliland Muuse Biixi Cabdi, ayaa sheegay in aanu jirin xeer qeexaya waxa la yeelayo haddii doorashooyinka urruradu wakhtigooda dib uga dhacaan, balse xal loo hayo doorashada madaxweynaha iyo guurtida.
Madaxweynuhu waxa uu sheegay in haddii xisbiyada wakhtigoodu dhamaado aan loo kordhin karayn, oo ay khasabtahay in doorashadooda la galo, xeerkii mudada loogu kordhin lahaa oo aan jirin awgeed.
Waxaanu yidhi.”Doorashooyinku haddii ay qabsoomi waayaan, saddex doorasho ayaa yaala, ta 1aad ee xisbiyada, haddii ay 10 sanno ka dhamaato xeerka uu baarlamaanku meel mariyay muu sheegin haddii wakhtigooda la qaban waayo halka loo marayo, markaa qaranka waxa ku waajib ah in wakhtigeedii la qabto”
Madaxweynuhu doorashooyinka madaxweynaha iyo guurtida ayuu sheegay in sharcigu sheegay halka loo marayo haddii ay wakhtigoodii ku qabsoomi waayaan, isaga oo uga jeeda in loo kordhin karayo mudada madaama oo uu jiro xeer sida tilmaamaya.
Waxa uu sheegay in ay sharci tahay in 10 kii sannoba mar la furo urrurada siyaasada, isla markaana doorashooyinku sida ay usoo kala horaynayaan loo raacayo sharciga oo loo sameeyay hay’addo ay kamid yihiin guddida diwaangalinta urrurada siyaasada iyo gudda doorashooyinka.
Waxa uu sheegay in hay’addaha doorashadu ay haystaan madaxbannaani buuxda oo sharcigu siiyay, isla markaana anay cidna ku farogalin karin shaqadooda, isaga oo intaa ku daray in nabada Somaliland ay tahay mid taama doorashooyinkiina la galayo.