Qore C/wahaab Daahir Xasan
Wasiirka Wasaaradda Caddaaladda Jamhuuriyadda Somaliland, Mudane Yoonis Axmed Yoonis, ayaa kormeer xaqiiqo raadis ah ku sameeyey Xabsiga Kamid Ah Gobolka Saraar.
Kormeerkan ayaa qayb ka ah qorshe xaqiiqo raadis ah, looguna kuurgalayo xaalada nololeed ee ka jirta xabsiyadda dalka, gaar ahaan xuquuqaha aasaasiga ah ee maxaabiista, xaalaadda nadaafadeed iyo baahiyahooda gaarka ah ee maxaabiista xabsiyadda dalka ku jira iyo guud ahaan caqabadaha haysta xabsiyadda sidii xal waara loogu heli lahaa.
Kormeerkan, ayaa wasiirka waxa ku wehelinayey saraakiil Wasaaradda Caddaaladda ka tirsan, waxaana weftiga Ka qaabilay Gudoomiyaha Gobolka Saraar, Maayir-ka Dagmada Caynaba iyo Taliyaha Xabsiga Caynaba.
Taliyaha Xabsiga Caynaba ayaa masuuliyiinta wasiirku hoggaaminaayey siiyey warbixinta Guud ee Xabsiga, isagoo sheegay in ay aad ugu faraxsan yihiin kormeerka wasiirku ugu yimid.
Wasiirka Ayaa Kormeerkan indho indhaynta ah kusoo maray dhamaan maxaabiista xabsiga kujirtay mid midna u waraystay xalada ay ku sugan yihiin.
Geesta kale Wasiir Yoonis Axmed Yoonis, ayaa hawlwadeennada xabsiga iyo guud ahaantood Ciidanka Asluubta uga mahadnaqay sida wanaagsan ee ay ula dhaqmaan maxaabiista, waxaannu ballanqaaday in ay ka dawlad ahaan ku dedaali doonaan horumarinta xabsiyadda iyo Ciidanka Asluubta, diyaarna ay u yihiin xalinta caqabadaha ka jira xabsiyadda.
Gabagabdii Wasiirka iyo masuuliyiinta la socotay waxa ay warraysteen maxaabiista Xabsiga ku jirta, iyagoo sidoo kalena si toos ah u darsay xaaladsa maxaabiista xabsiga ku jirtaa ku nool yihiin, Wasiirka Cadaaladda Ayaa Booqday Xafiiska Wasaaradda Cadaaladdu ku Leedahay Gobolka Saraar Halkaas oo uu Kusoo Dhaweeyey Iskuduwaha Gobolka Saraar iyo Shaqaalaha Wasaaradda Cadaaladda.