Hogaamiyayaasha Koonfurta Afrika ayaa ku dhawaaqay inay ciidamadooda kala baxayaan bariga Jamhuuriyadda Dimuqraadiga ah ee Congo, halkaas oo ay ka caawinayeen dowladda inay la dagaalanto xoogagga mucaaradka.
Ciidamadan ayaa loo diray laba sano ka hor si ay u taageeraan ciidamada Congo si ay ula dagaalamaan jabhadda M23 ee Rwanda ay taageerto, kuwaas oo sanadkan qabsaday qeybo badan oo ka mid ah bariga DR Congo oo macdanta qaniga ku ah.
Ugu yaraan 19 askari oo u dhashay Koonfur Afrika, Malawi iyo Tanzania ayaa la dilay markii M23 ay qabsadeen magaalada ugu weyn gobolka ee Goma bishii Janaayo.
Kumanaan kun oo qof ayaa ku dhintay intii uu socday dagaalka iyada oo boqolaal kun ay gabaad la’aan yihiin kadib markii ay ka carareen guryahooda.
Waxaa jiray walaac laga qabo in dagaalku uu isu rogo colaad gobolka oo ballaadhan.
M23 ayaa wali ku sii xoogaysanaysa bariga DR Congo waxayna bishii hore qabsadeen magaalada labaad ee ugu wayn gobolka Bukavu.
Ciidamada Koonfur Afrika loo diray Congo ayaa waxaa si weyn u dhaliilay shacabka iyo mucaaradka kadib markii la dilay askarteeda.
Madaxweynaha Koonfur Afrika Cyril Ramaphosa oo ku dhawaaqay ka bixitaanka Midowga Afrika ayaa sheegay in xaaladdu ay tahay mid halis ah, balse nabadda sida ay hadda tahay ay ku jirto.
Si kastaba ha ahaatee, M23 ayaa sii waday qabsashada dhul badan todobaadkan.
Sandile Swanda, oo ah falanqeeye siyaasadda Koonfur Afrika, ayaa BBC-da u sheegtay in ay “wax laga xishoodo” ku tahay dalkeeda.
“Falaagadu aad bay u xoog badan yihiin, kani waa dagaal buuxa, Koonfur Afrikana diyaar uma aha dagaal caynkaas ah,” ayuu yidhi.
Wuxuu intaas ku daray: “Ma jiro waddan ku yaalla gobolka Sadc oo diyaar u ah dagaalkan – nafsiyan, ciidan ahaan iyo siyaasad ahaanba.”
Laakiin ka bixitaanku maaha kaliya dib u dhac ku yimaada Koonfur Afrika, ee waxay dhabarjab ku tahay Sadc iyo DR Congo labadaba, dadka falanqeeya ayaa sidaa qaba leh.
Bishii Febraayo, madaxweynaha Malawi wuxuu sheegay in ciidamadooda laga saari doono DR Congo , inkasta oo aanu sheegin sabab.