Qore Khadar M .Xaashi
Gabiley (Dawan) Wasiirka Wasaaradda Maaliyadda iyo Horumarinta Dhaqaalaha JSL Mudane, Cabdillaahi Xasan Aadan, oo ka mid ahaa Madaxdii Dawladda ee tukashadii Salaada Ciida kala qayb galey dadweynaha reer Gabiley, ayaa kadib salaadii ciida qaybo ka mida dadweynaha reer Gabiley wakhti kula qaatay faras-magaalaha Gabiley, isaga oo dadweyne tiro badan kula shaaheeyey Maqaayada caanka ah ee Cali-Xawaash.
Dadweyne isugu jira qaybaha bulshada sida dhalinyarada, culimo awdiinka, ganacsatada, cuqaasha iyo waxgaradka magaalada ayey Wasiirka wakhti isu heleen iyada oo halkaa la is ku waydaarsaday arimo badan oo la xidhiidha guud ahaan waaqica guud ee dalka iyo kuwa gaarka ah gobolka Gabiley.
Wasiirka ayaa intii uu ku sugnaa Gabiley booqday meelo muhiim ah oo ay ka mid tahay Maktabada Qaranka ee Gabiley (Gabiley National Library), waxaanu bilawgiiba saxeexay Diwaanka Booqashada Maktabada, iyada oo Wasiirka la soo mariyey qaybaha Maktabadan Casriga ahi ka kooban tahay, waxaanu boggaadiyey kaalinta ay bahda aqoonta iyo guud ahaanba Dalka uugu jirto.
Wasiirka ayaa bulshada la wadaagay hadalo waano ah, isaga oo bulshada reer Gabiley faray inay hormuud ka noqdaan ka shaqaynta wadajirka iyo midnimada umada reer Somaliland, geesta kalana ay kor u qaadaan wax-soo-saarkii iyo tacabkii looga bartay reer Gabiley.
Geesta kale waxa uu wasiirku la shiray haldoorka iyo labeenta dhallinyarada gobolka Gabiley, waxaaney halkaasi ku weydiiyeen su’aalo la xidhiidha horumarinta, gobolka iyo dhallinyarada iyo waxa ka xukuumad ahaan uga meel yaala, isla markaana wasiirku mid mid ayuu uga jawaabey su’aalihii ay ka weydiiyeen.
Dhankale waxa uu siweyn u boggaadiyay masuuliyiinta gacanta ku haya Jaamacada Timacade, Maktabada Gabiley iyo Xarunta akhriska waxaanu sheegay inay ka soo dhalaaleen hawlihii loo igmaday.
Waxaanu yidhi.“Waan boggaadinaya cidkasta oo ka shaqaysay Maktabada Qaranka ee Gabiley, cidkasta oo ka shaqaysay wax fiican ayay ka shaqaysay, sidoo kale waxaan hanbalyaynaya cidkasta oo ka shaqaysay Jaamacada Tima-cade ee jirtay 17-ka sannadood culeyskasta oo ku dhacayay iyo mushkiladkasta oo ku dhacaysay, waxa uu guddoomiyuhu ii sheegay in Kombaskan ay ku jiraan kun iyo boqol arday, dugsiga farsamada gacanta ee Gabileyna isagana hawl fiican ayaa laga qabtay, siwacana way u socota hawshiisu”.
Wasiir Cabdillaahi waxa uu sheegay in mudnaanta kowaad ay siinayaan sidii loo abuuri lahaa siyaasadii guud ee degmada Gabiley wax loogu qabanlahaa iyada oo gacmaha la is haysto.
Waxaanu yidhi.“Manihin xisbi, manihin cidkale, caawa waxa aynu ka hadlayna Gabiley, Gabiley maxaynu u qabanaa? Gabiley maxay ku habboon tahay? Ahmiyaduna waa inay Gabiley yeelato qorshe siyaasadeed laga duulo, mudnaantuna waxa ay tahay gacmo wada jir ayay wax ku gooyaane inaynu wada shaqeyno”