Tababaraha Arsenal, Mikel Arteta, ayaa xaqiijiyay labo dhaawac oo soo gaadhay kooxdiisa kaddib guushii 2–0 ee ay ka gaadheen Burnley Sabtidii. Viktor Gyökeres iyo Declan Rice ayaa dhaliyay labada gool oo qeybta hore ah, taasoo Gunners ku riixday hoggaanka Premier League iyaga oo haatan 7 dhibcood ka sarreeya kooxda ku jirta kaalinta labaad. Si kastaba ha ahaatee, guushaas ayaa timid iyadoo ay jirto walwal dhaawac ah. Gyökeres ayaa la beddelay qeybtii nasashada ciyaarta, halka Martin Zubimendi uu isagu codsaday in la saaro qeybtii labaad, waxaana lagu beddelay Christian Nørgaard. Arteta oo ka hadlay xaaladdooda ayaa yidhi: “Viktor Gyökeres waan saarnay, sababtoo ah wuxuu dareemay xanuun muruqa ah. Martin Zubimendi isna wuxuu codsaday in la beddelo, sidaa darteed waa inaan sugno oo aragno xaaladooda.” Arsenal ayaa u safri doonta Slavia Prague toddobaadka soo socda kulanka Champions League, waxaana weli la sugayaa go’aanka dhakhaatiirta ee ku saabsan labadan ciyaaryahan.
