Xiddiga da’da yar ee Barcelona Lamine Yamal ayaa si rasmi ah u shaaciyay inuu jaray xidhiidhkii fannaanadda reer Argentina Nicki Nicole, kadib xidhiidh jacayl oo muddo dhowr bilood ah oo soo jiitay warbaahinta ciyaaraha iyo tan madadaalada. Xidhiidhka labada qof ayaa noqday mid si weyn loo hadal hayo tan iyo markii sawirkoodii ugu horreeyay si wadajir ah loo arkay, iyadoo sidoo kale da’ kala duwanaanshahooda iyo muuqaaladooda badan ee fagaarayaasha ay xiise gaar ah ku abuureen taageerayaasha. Si kastaba ha ahaatee, xiisad iyo isfaham la’aan ayaa lagu soo warramay inay ka dhalatay xidhiidhka, gaar ahaan markii Yamal uu u safray magaalada Milan si uu uga qeyb galo xaflad gaar ah — arrin dhalisay warar sheegaya in uu jiri karo khiyaano jacayl oo keentay kala tagga. Waxaase arrintaas si cad u beeniyay Yamal, isaga oo wareysi uu siiyay wariyaha Xabi Ouis ku sheegay “Waan kala tagnay oo kaliya, arrintaas ayaan soo afjaray. Wax kasta oo hadda laga hadlayo ma laha wax la xidhiidha runta.” Wuxuu sii raaciyay:“Ma aanan khiyaameyn, mana aanan la joogin qof kale.”
Hadalkan ayaa si rasmi ah u xidhay wararkii iyo mala-awaalkii ku wareegayay kala tagga labadooda, iyadoo Lamine Yamal uu carabka ku adkeeyay inuu hadda doonayo inuu xooga saaro kubaddiisa iyo mustaqbalkiisa Barcelona iyo xulka Spain, gaar ahaan iyadoo jadwalku yahay mid ciriiri ah iyadoo filashooyinka ku saabsan koboca xirfadiisa ay sii kordhayaan.
