Iyada oo Madaxweyne Trump uu rajo wanaagsan ka muujiyay wadahadallada uu la yeelanayo Iiraan oo dagaalka lagu joojinayo, hadana Ilo wareedyo ayaa sheegaya in askarta Maraykanka ee ka tirsan Qaybta 82aad ee Ciidanka Cirka la filayo in la geeyo maalmaha soo socda.
CNN ayaa werisay in qiyaastii 1,000 askari oo Maraykan ah oo ka tirsan Qaybta 82aad ee Ciidanka Cirka ay filayaan inay u diraan Bariga Dhexe maalmaha soo socda. Qaybta 82aad, oo ah qaybta kaliya ee Ciidanka Maraykanka ee meel kasta oo adduunka ah ka hawlgeli karta, 18 saacadood gudahood ayaa laga yaabaa in laga qaado saldhiggeeda North Carolina, iyada oo la ilaalinayo waxa loogu yeedho awoodda Ciidanka ee Jawaab-celinta Degdegga ah (IRF).
Awooddaas waxaa la tijaabiyay 2021 markii qaybo ka mid ah qaybta loo diray Garoonka Caalamiga ah ee Hamid Karzai ee Kabul, Afghanistan, si ay gacan uga geystaan daadgureynta dadka iyada oo dowladda Maraykanku ay joojisay howlihii ay ka haysay dalkaa.
Qaybtu waxay ka kooban tahay saddex kooxood oo dagaal oo midkiiba uu ka kooban yahay qiyaastii 4,000 oo askari, guuto duuliye oo leh diyaaradaha qumaatiga u kaca ee weerarka, gaadiidka iyo kuwa xamuulka qaada, cutub madaafiic ah, guuto saadka ah, iyo guuto xarunteeda ah.
Qaybtan 82aad ee Ciidanka Lugta ayaa la sameeyay intii lagu jiray Dagaalkii Koowaad ee Adduunka laakiin waa la joojiyay markii dagaalku dhammaaday.
Waxa hadna dib loo celiyey wax yar ka dib bilowgii Dagaalkii Labaad ee Adduunka, bishii Agoosto 1942-kiina waxay noqotay qaybtii ugu horreysay ee Ciidanka cirka waxayna ka dagaallantay qaar ka mid ah ololayaashii ugu muhiimsanaa ee dagaalka, oo ay ku jiraan duullaankii Normandy 1944-kii.