Ku dhowaad dhammaan caalamka ayaa hadda isha ku haya bilowga tartanka Koobka Adduunka 2026, kaas oo lagu qaban doono dalalka Mareykanka, Canada, iyo Mexico. Inkasta oo markii ugu horreysay tirada xulalka laga dhigay 48 kooxood, haddana xiddigo badan oo magac weyn ku leh kubadda cagta ayaan ka muuqan doonin tartankan. Warbixintan waxay soo bandhigaysaa 16 ciyaaryahan oo caan ah oo seegaya tartanka, sababo la xidhiidha xulalkooda oo u soo bixi waayay ama dhaawacyo halis ah soo gaadhay:
Robert Lewandowski (Poland): Weeraryahanka Barcelona ayaan ka qeybgali doonin tartanka ka dib markii xulka Poland uu ku fashilmay inuu ka gudbo wareegga isreeb-reebka (playoffs).
Gianluigi Donnarumma (Italy): Xulka Talyaaniga ayaa markii saddexaad oo xidhiidh ah seegaya Koobka Adduunka.
Khvicha Kvaratskhelia (Georgia): Xiddiga Paris Saint-Germain oo ka mid ah garbaha ugu fiican adduunka ayaa ka maqnaan doona tartanka maadaama Georgia aannay soo bixin.
Victor Osimhen (Nigeria): Weeraryahanka Galatasaray ayaan ka muuqan doonin Mareykanka ka dib markii “Super Eagles” ay ku fashilmeen inay gaadhaan final-ka.
Dominik Szoboszlai (Hungary): Kabtanka Hungary iyo xiddiga Liverpool ayaa ka maqnaan doona liiska ka dib markii xulkiisu ku haray isreeb-reebka.
Dusan Vlahovic (Serbia): Weeraryahanka Juventus ayaa seegaya tartanka maadaama Serbia ay weysay boos ay ku timaado Koobka Adduunka.
Rodrigo (Brazil): Xiddiga Real Madrid ayaan tartanka ka qeybgali doonin maadaama dhaawac halis ah oo dhanka jilibka ah uu soo gaadhay.
Jan Oblak iyo Benjamin Sesko (Slovenia): Labadan xiddig ee ka ciyaara horyaallada Spain iyo England ayaa seegaya tartanka ka dib markii Slovenia lagu reebay isreeb-reebka.
Sandro Tonali iyo Alessandro Bastoni (Italy): Waxay ku biirayaan saaxiibkood Donnarumma oo kamid ah liiska xiddigaha Talyaaniga ee ka maqan tartanka weyn.
Bryan Mbeumo (Cameroon): Xiddiga Manchester United ayaan ka qeybgali doonin tartanka ka dib markii Cameroon lagu reebay wareegga isreeb-reebka ee qaaradda Afrika.
Pierre-Emerick Aubameyang (Gabon): Isagana wali uma suurtagalin inuu ka soo muuqdo Koobka Adduunka ka dib markii Gabon ay ka hartay tartanka.
Serhou Guirassy (Guinea): Weeraryahanka gool-dhallinta badan ee Borussia Dortmund ayaan joogi doonin maadaama Guinea aannay u soo bixin tartanka.
Hugo Ekitike (France): Weeraryahanka wacdaraha dhigaya ee Liverpool ayaa ku seegaya Koobka Adduunka dhaawac awgiis.
Serge Gnabry (Germany): Xiddigan oo xilli-ciyaareed cajiib ah la qaadanayay Bayern Munich ayaa isna dhaawac uga haraya tartanka.