Lix qof ayaa si xun loogu toogtay xarun lagu xanaaneeyo hooyooyinka iyo carruurta, waxaana toogtay qof looga shakisan yahay inuu ku lug lahaa muran ku saabsan gabadhiisa yar, sida ay sheegeen booliiska Jarmalka.
Dadka dhintay – afar dumar ah iyo laba rag ah – dhammaantood waxay ahaayeen shaqaale ka tirsan xarunta oo ku taal magaalada waqooyiga ku taal ee Stade, oo u dhow Hamburg. Tiro dad ah oo kale ayaa sidoo kale dhaawacmay.
Mas’uuliyiintu waxay sheegeen in ilmaha yar oo saddex bilood jir ah iyo hooyadeed ay xafiiska ku jireen xilligaas laakiin wax dhibaato ahi ma gaadhin.
Saddex qof oo ay ku jiraan qofkii looga shakisanaa inuu hubaysnaa ayaa boolisku xidheen, mas’uuliyiintuna waxay sheegeen in aanay jirin wax khatar ah oo kale oo soo food saartay dadweynaha.
Toogashada ayaa u muuqatay mid “lagu sameeyay sababo qoys awgood”, sida ay sheegtay Wasiirka Arrimaha Gudaha ee Lower Saxony, Daniela Behrens, goor dambe oo Isniintii ah.
Waxay ugu yeedhay “fal rabshado ah oo lagu fuliyay si aad u qabow, iyada oo aan lahayn ujeeddooyin siyaasadeed ama dhaqaale”.
Rasaas ayaa markii ugu horreysay la soo sheegay abbaare 12:10 waqtiga maxalliga ah (10:10 GMT), sida ay sheegeen booliiska maxalliga ah, kuwaas oo markii dambe xaqiijiyay “dilal oo ay ku lug lahaayeen dhibanayaal badan” inay ka dhaceen “xarun daryeel dhallinyaro” oo ku taal Dankerstrasse waxayna u sheegeen dadweynaha inay ka fogaadaan aagga.
Booliska ayaa sheegay in haweenka iyo hal nin lagu toogtay gudaha xarunta, iyada oo qofkii lixaad uu markii dambe u dhintay dhaawacyadii soo gaadhay isbitaalka. Dhammaan dhibanayaashu waxay ahaayeen dad waaweyn.
Taliyaha booliiska Lueneburg Kathrin Schuol ayaa sheegay in ninka looga shakisan yahay inuu weerarka geystay uu ahaa muwaadin Turki ah oo 45 jir ah oo ku dhashay Jarmalka, kuna noolaa Hanover.
Wuxuu ballan la lahaa xarunta Isniintii “oo uu la yeeshay dhibanayaal badan” si uu ugala hadlo daryeelka gabadhiisa, ayuu raaciyay Schuol.
Waxay sheegtay in booliisku ay ka yaqaaneen “hanjabaado” laakiin aan loo arkin “qof aad u rabshad badan”. Ma aanu haysan shatiga hubka.
School ayaa sheegay in tuhmanaha uu markii hore goobta ka baxsaday isaga oo wata gaadhi ay haweeney wadatay.