Xiddiga reer Portugal Cristiano Ronaldo ayaa muddo dheer lahaa xiriir mararka qaar muran iyo khilaaf ku dhex maray isaga iyo tababarayaashii uu la soo shaqeeyay. Khilaafkii ugu dambeeyay ayaa mar kale soo shaac baxay kadib markii Ronaldo uu si lama filaan ah uga baxay xerada xulka Portugal, kaddib markii uu kursiga keydka ku qaatay kulankii Norway ee UEFA Nations League.
Ronaldo oo 41 jir ah ayaa hadda wajahaya su’aalo badan oo ku saabsan sababta uu xerada uga baxay, iyadoo la sugayo faahfaahin dheeraad ah oo isaga kasoo baxda. Hase yeeshee, dhacdadan ayaa ah mid ku biiraysa taariikh dheer oo ay ku jireen muranno dhex maray Ronaldo iyo tababarayaal kala duwan.
- Manchester United iyo cadaadiskii uu bixitaanka ku doonayay
Khilaafaadkii waaweynaa ee Ronaldo iyo tababarayaal ayaa si weyn loo xusuustaa xilligii uu waayihiisii ugu horreeyay ku jiray Manchester United.
Ronaldo ayaa xilligaas taageeray hadallo uu sheegay madaxweynihii hore ee FIFA Sepp Blatter, kuwaas oo la xiriiray rabitaankiisa ah inuu u wareego Real Madrid. Sidoo kale, 2008 ayuu Ronaldo si aan fasax loo siin uga baxay garoonka intii ay Manchester United la ciyaaraysay Sunderland. Sannadkii 2009-na, wuxuu si cad oo caro leh uga falceliyay markii laga beddelay ciyaar ay Manchester United la ciyaaraysay Manchester City.
- Real Madrid iyo khilaafkii José Mourinho
Bilowgii xiriirka Cristiano Ronaldo iyo tababare José Mourinho wuxuu ahaa mid wanaagsan, maadaama labadooduba ay yihiin Portuguese, isla markaana ay si weyn ugu guuleysteen Real Madrid. Laakiin xilli ciyaareedkii ugu dambeeyay ee Mourinho uu joogay Real Madrid ayaa xiriirkoodu xumaaday. Bishii September 2012, Ronaldo ma uusan dabaaldegin labadii gool ee uu ka dhaliyay Granada, waxaana uu sheegay inuu jiray “sabab xirfadeed” oo keentay inuu murugoodo oo uusan ku faraxsanayn kooxda. Sannadkii 2013, xiriirka labada nin wuxuu gaaray meel aad u adag, waxaana la soo wariyay inuu khilaaf xooggan dhex maray gudaha qolka labiska. Mourinho ayaa markii dambe Ronaldo ku tilmaamay ciyaaryahan aaminsan inuu wax walba yaqaan.
- Rafael Benítez iyo Carlo Ancelotti
Dhibaatooyinka Ronaldo iyo tababarayaasha kuma ekaan Mourinho. Markii Rafael Benítez loo magacaabay tababaraha Real Madrid, Ronaldo wuxuu muujiyay inuusan si buuxda ugu qanacsanayn habka tababareedka iyo farsamada Benítez. Dhanka kale, Ronaldo wuxuu si weyn u ammaanayay tababarihii ka horreeyay, Carlo Ancelotti, taasoo sii muujisay farqiga u dhexeeyay xiriirka xiddiga iyo tababaraha cusub.
Benítez ayaa ugu dambeyn xilka laga qaaday lix bilood oo kaliya kadib markii uu qabtay shaqada.
- Manchester United iyo Erik ten Hag
Markii Ronaldo uu mar kale ku soo laabtay Manchester United kadib waayihiisii Juventus, waxaa soo noqday dhacdooyin la xiriiray tababarayaasha. Intii uu tababare ahaa Ralf Rangnick, Ronaldo ayaa dhulka ku tuuray funaanaddiisa markii laga beddelay ciyaar ay Manchester United la ciyaaraysay Brentford. Kadib markii Erik ten Hag uu noqday tababaraha United, khilaafku wuxuu gaaray heer ka sii sarreeya. Ronaldo ayaa diiday inuu beddel ahaan u soo galo ciyaartii Tottenham, wuxuuna ka baxay garoonka ka hor inta aysan ciyaartu dhammaan. Ugu dambeyn, Ronaldo wuxuu wareysi xasaasi ah siiyay Piers Morgan, isagoo dhaleeceeyay maamulka Manchester United iyo Ten Hag. Arrintaas ayaa keentay in heshiiskii Ronaldo iyo Manchester United si wadajir ah loo soo afjaro.
- Khilaafkii xulka Portugal ee Fernando Santos
Koobkii Adduunka ee Qatar 2022, Ronaldo wuxuu sidoo kale la kulmay xaalad muran dhalisay. Tababarihii Portugal ee xilligaas, Fernando Santos, ayaa Ronaldo kursiga keydka dhigay kulankii wareegga 16-ka ee Switzerland. Go’aankaasi wuxuu dhaliyay caro weyn, iyadoo Ronaldo iyo xubno ka tirsan qoyskiisa ay si cad uga falceliyeen go’aanka tababaraha.
- Jorge Jesus iyo xaaladda ugu dambeysay: Kadib muddo uu si wanaagsan ula shaqeynayay Roberto Martínez, Ronaldo ayaa mar kale wajahaya xaalad muran dhalisay. Tababaraha cusub ee Portugal, Jorge Jesus, ayaa Ronaldo kursiga keydka ku reebay kulankii Norway ee Nations League, waxaana ciyaaryahanku uusan gabi ahaanba ciyaarta soo gelin. Arrinta ayaa kasii dartay markii Jorge Jesus uu sheegay inuusan dammaanad qaadi karin in Ronaldo uu kulanka xiga ee Denmark ku bilaaban doono shaxda koowaad.
Tababaraha ayaa xitaa sheegay inay suuragal tahay inuu weerarka ku bilaabo Gonçalo Ramos. Wax yar kadib, Ronaldo ayaa ka baxay xerada xulka Portugal, isagoo u rajeeyay saaxiibbadiis guul, isla markaana tilmaamay inuu mustaqbalka dhow ka hadli doono xaqiiqada dhacdadan.