Qore Axmed M. Saleebaan
Hargeysa (Dawan)- Bangiga Dhexe ee Somaliland ayaa si rasmi ah uga mid noqday Ururka Caalamiga ah ee Cayminta Dhigaalka (IADI), taasoo ah tallaabo horumarineed oo muhiim u ah kobcinta kalsoonida iyo xasilloonida nidaamka maaliyadeed ee dalka. Xubinnimadan cusub waxay u fureysaa Somaliland albaabada iskaashi ballaadhan oo caalami ah, iyada oo qayb muhiim ah ka noqon doonta wadahadalka iyo horumarinta halbeegyada caymiska dhigaalka iyo ilaalinta kaydka dadweynaha.
Muhiimadda Xubinnimada IADI:
Ururka IADI oo xaruntiisu tahay Basel, Switzerland, waxa uu ka kooban yahay in ka badan 100 hay’adood oo maaliyadeed oo ay ka mid yihiin bangiyo dhexe, hay’ado caymis dhigaal iyo kormeerayaal dhaqaale. Ujeeddada ururkan ayaa ah in la xoojiyo habraacyada cayminta dhigaalka si loo ilaaliyo xasiloonida nidaamka maaliyadeed. Tallaabadan waxay caddeynaysaa sida ay Somaliland uga go’an tahay in ay la jaanqaaddo nidaamka dhaqaale ee caalamiga ah.
Guddoomiyaha Bangiga Dhexe ee Somaliland, Cabdinaasir Axmed Xirsi, ayaa sheegay in xubinnimada IADI ay tahay astaan muujinaysa sida caalamku u aqoonsan yahay kartida iyo dedaalka Somaliland ee dhinaca maamulka maaliyadeed. Wuxuu sidoo kale carrabka ku adkeeyay in iskaashigan uu yahay mid fure u ah dhisidda Hay’adda Qaran ee Cayminta Dhigaalka, taasoo muhiim u noqon doonta ilaalinta danaha macaamiisha bangiyada gudaha.
Somaliland iyo Taiwan: Iskaashi Maaliyadeed oo Koraya
Intii lagu guda jiray safarka Taipei, Guddoomiye Cabdinaasir iyo wafdigiisa waxa ay kulamo la yeesheen hay’ado muhiim ah sida Bangiga Dhexe ee Taiwan, Hay’adda Kormeerka Maaliyadda (FSC), iyo CDIC Taiwan, taas oo martigelisay shirkii IADI. Kulamadan waxa diirradda lagu saaray xoojinta xidhiidhka labada dal, gaar ahaan dhinacyada caymiska dhigaalka, tiknoolajiyadda maaliyadda, iyo kobcinta awoodaha hay’adaha dhaqaalaha.
Taiwan oo ah saaxiib muhiim ah oo istaraatiiji ah u ah Somaliland, ayaa door muuqda ku leh horumarinta nidaamyada maaliyadeed ee dalka, iyadoo ay horey u jireen iskaashi dhanka tiknoolajiyadda, waxbarashada, iyo caafimaadka. Maanta, xidhiidhkaasi wuxuu gaadhay heer cusub oo ay labada dal iska kaashanayaan sidii Somaliland uga mid noqon lahayd nidaamka dhaqaale ee xasilloon, hufan, isla markaana la jaan qaadaya dunida.
Somaliland oo Ku Sii Siqaysa Hoggaan Dhaqaale oo heer Caalami ah:
Xidhiidhka caalamiga ah ee Somaliland ee dhinaca dhaqaalaha waxa uu barbar socdaa qorshaha istaraatiijiga ah ee dalka ee ku saleysan in laga faa’iideysto goobta istaraatiijiga ah ee Berbera iyo marin-badeedka muhiimka ah ee Gacanka Cadmeed. Mashruucyada horumarineed sida Dekedda Berbera, Aagga Cashuuraha Ka Caaggan, iyo waddada Berbera ilaa Itoobiya waxay sare u qaadi doonaan tartanka gobolka, iyaga oo Somaliland u beddeli kara xarun ganacsi oo muhiim ah.
Gabagabo: Farriin Caalami ah oo Ka Socota Somaliland:
Farriinta uu diray Guddoomiyaha Bangiga Dhexe ee Somaliland waxay ahayd mid ku wajahan caalamka: in Somaliland ay tahay dal leh nidaamyo shaqeynaya, hufan, kana go’antahay horumar iyo iskaashi dhab ah. Xubinnimada IADI iyo iskaashiga Taiwan waa tallaabooyin cad oo muujinaya sida ay u jirto aragti fog oo ku wajahan koboca dhaqaalaha iyo madaxbannaanida dhaqaale ee Somaliland.
Tani maaha kaliya guul farsamo, balse waa farriin siyaasadeed oo culus: in dimuqraadiyada, xasiloonida iyo maarayn hufan oo maaliyadeed ay noqon karaan dariiq sugan oo lagu gaadho aqoonsi iyo iskaashi caalami ah.