Hargeysa ( Dawan)-Afhayeenka xisbiga mucaaridka ah ee WADDANI Xildhibaan Ibraahim Mahdi Buubaa ayaa Ciidammada Qaranka ugu baaqay in aanay ka amar qaadan xukuumada Somaliland, oo uu sheegay in aanay waxba u soo sidin waxna ugu maqnayn. Dhawaaqaasi oo ah mid fadeexad weyn ku ah xisbigaasi oo beryahan dambe si joogto ah u laasimay inay farogeliyaan waxna ka sheegaan ciidammadda noocyadooda kala duwan.
Mr Buubaa oo Isniintii qaar ka mid ah saxaafadda ugu waramayey magaalada Hargeysa, waxa uu intaas raaciyey in aanay jirin xukuumad ay Ciidammada Qaranku isku haleeyaan, oo ay wax ka sugaan, isaga oo isla mar ahaantaasna Ciidamada Qaranka u soo jeediyey in aanay wax awaamiir ah ka qaadan , Xukuumada Somaliland ee ka tallisa dalka, balse ay iyagu is difaacaan oo amaankooda ilaashadaan, kana amar qaataan Taliyeyaashooda oo keliya. “Waxaan leeyahay Ciidankoow ma jirto xukuumad idiin soo socota oo aad wax ka sugtaane’ idinku isku tashada oo amaankiina ilaashada, Xukumadda haatan jirtana ha isku halaynina oo waxba ha ka sugina, waxna ha ka qaadanina ee amnigiina suga, oo waxaad fulisaan awaamiirta Taliyeyaashiina oo keliya, cid kalena ha ka amar qaadanina ee ka amar qaata madaxdiina oo keliya,” ayuu yidhi Afhayeenka xisbiga Waddani. Af-hayeenka Xisbiga Waddani oo hadalkiisu u muuqday mid qayb ka ah oo lagu taageerayo shirqoolada kala duwan ee cadawga Somaliland iyo kuwa la afkaarta ahi ugu xusul duuban yihiin in ay ku minjo xaabiyaan nabadgelyada ay reer Somaliland haysataan, iyo Qorsheyaasha horumarineed ee xukuumada Somaliland ugu talLo-gashay in ay ku soo saarto khayraadka dihin ee dalkeenna ALLE ku manaystay, si ay muwaadiniinta reer Somaliland ee saboolnimada iyo shaqo la’aantu daashadeen uga faa’iidaystaan, oo dhaqaale iyo shaqo abuurba uga helaan. waxa kale oo uu ka hadlay Xildhibaanku Ciidanka OPU-da oo ah Ciidan Boolis ah oo loogu tallo galay in ay ilaaliyaan amaanka iyo nabadgelyada shirkadaha shisheeyaha ah ee shidaalka wadanka ka baadhaya. Kuwaas oo uu ku tilmaamay Ciidan Beeleed sharci darro ah oo ay cid gaar ahi samaysanayso. Sidaas awgeedna waxa uu shacbiga reer Somaliland ugu baaqay in aanay ogolaanin oo ay ka hor yimaadaan Ciidamadaas iyo shirkadaha ajanebiga ah ee ay xukuumada Somaliland heshiiska kula gashay in ay baadhaan, isla markaana soo saaraan shidaalka iyo khayraadka dabiiciga ah ee dalkeenna ku jira. Isaga oo arrimahaas ka hadlayayna Mr Buubaa waxa uu yidhi “Ciidanka Cusub ee Madaxwaynaha somaliland Digreetada ku magacaabay ee la yidhaahdo OPU –du Waa sharci darro, oo sharci darradii hore ee uu ku dhaqmi Jiray ayuu tana ku daray, Sidaas darteed Ciidamadaasi waa Ciidan beeleed sharci darro ah oo ay cid gaar ahi samaysanayso, shirkadahan shidaalka baadhaya ee ay xukuumadu heshiiska la gashay iyaguna waa sharci darro. Sidaa daraadeed shacbiga waxaanu ku boorinaynaa, oo aanu u sheegaynaa in aanay ogolaanin ee ay diidaan, oo ay ka hor yimaadaan Ciidamadaas iyo Sharaa’igan Shidaalka baadhayaba.”
Afhayeenka Xisbiga Waddani Ibraahim Mahdi Buubaa oo ah wiil uu adeer u yahay ninka Somaliland diid-nimada ku caan baxay ee lagu magacaabo Ismaaciil Buubaa, ayaan la garanaynin in dhawaaqiisani yahay mid qeyb ka ah dagaalka uu adeerkii iyo cadawga uu daba-dhilifka u yahay kula jiraan Qaranimadda Somaliland iyo inuu yahay hadal ka tarjumaya siyaasada xisbiga WADDANI ee uu af-hayeenka u yahay, xisbigaas oo muddooyinkan dambe caado ka dhigtay in uu ka hor yimaado, isla markaana si qaawan oo wadaniyada ka fog u naqdiyo talaabo kasta oo Ummadda wax loogu qabanayo, oo uu qaranku xaga horumarka iyo wanaaga u qaadayo.
Dawannews Hargeysa office
