Hargaysa(Dawan): Dawladda Somaliland ayaa markii u horaysay waxay shaaca ka qaaday in ay dalkeedda ka mamnuucday in lagu isticmaalo kalluunka dalka dibadda uga iman jiray.
Wasiirka Wasaaradda Kalluumaysiga iyo khayraadka Badaha ee Somaliland Cali Jaamac Faarax (Buureed), oo shalay shir jaraa’id ku qabtay xafiiskiisa ayaa sheegay in la joojiyay dhamaan Kalluunkii dalka kaga iman jiray Dibadda.
Waxa uu tilmaamay in Somaliland uu markii hore Kalluunku uga iman jiray dalal kala duwan sida Soomaaliya, hase yeeshee laga bilaabo maanta in la joojiyay. Isagoo arrimahaasi ka hadlayayna waxa uu yidhi “Maanta (shalay) laga bilaabo wasaaradda Kalluumaysiga iyo khayraadka Baduhu waxay joojisay in aan dalka Somaliland la keeni karin Kalluun ka yimid dalka dibadiisa. Markii hore dalka waxaa la keeni jiray Kalluun laga keeno Xamar Maanta (shalay) laga bilaabo dalka waanu ka mamnuucnay.”
Waxa kale oo uu sheegay wasiirku in ay amar ku siiyeen garoomadda diyaaradaha iyo dekadaha dalka in aan laga soo dejin Karin wax Kalluun ah. tallaabadaasi oo uu wasiirku ku tilmaamay in ay tahay mid lagu dhiiri gelinayo in dalka Somaliland lagu isticmaalo Kalluun-kiisa.
“Waxaanu dhamaan Amar buuxa siinay Madaaradda dalka iyo dekadaha, si aanay Kalluun dalka u soo gelin, haddii aanu nahay wasaaradda Kalluumaysiga waxaanu dhiiri gelinaynaa in dalka Somaliland lagu isticmaalo Kalluun-kiisa” ayuu yidhi wasiirka Kalluumaysigu.
Dhinaca kale Wasiir Buureed, ayaa ugu baaqay Kalluumaysatadda dalka in ay jabiyaan qiimaha ay ku iibiyaan Kalluunka. Waxaanu yidhi “Waxaan ku war-gelinayaa dhamaanba Kalluumaysatadda dalkan Somaliland in ay Jabiyaan qiimaha Kalluunka oo ay dadka ka haqab-tiraan.”
Dawannews Hargeysa office
