Hargeysa (Dawan): Guddoomiye xigeenka koowaad ee Golaha Wakiiladda Somaliland Baashe Maxamed Faarax ayaa baaq nabadeed u diray beelihii ay dirirtu ku dhexmartay degaanka Taleex, waxaanu u soo jeediyay inay joojiyaan dagaalka, isla markaana labada beelood ixtiraamaan baaqyada nabadeed iyo ergooyinka kala dhexgalaya.
Md. Baashe Maxamed Faarax oo shalay xafiiskiisa ugu waramay saxaafadda waxa kale oo uu sheegay in xal u helida arrintan lagu dhamaayo hab dhaqan.
“Waxa laba reer oo walaalo ah. Dagaal wax allaale wax uu taraa ma jiro dagaalka Soomaaliduna waa dhibaato uun iska socota. Waxaanu u soo jeedinaynaa inay dagaalka ka waantoobaan oo caqligu shaqeeyo, oo ay xabbadda joojiyaan, oo ay maqlaan dadka Ergada ah ee jooga Taleex. Ergaduna waa inay kala dhex galaan beelaha. Waa in heshiiskaasi laga dhigaa mid aan soo noq-noqon, waa in laga dhigo heshiis adag oo tolku talaabo adag ka qaadaan.” Ayuu yidhi Baashe Maxamed Faarax
Baashe oo hadalkiisa sii watay, waxa uu yidhi “Waxaanu labadaas beelood u soo jeedinaynaa dagaal waxba ma taro, laguma kala guulaysto oo guul ma keeno, waxaad dilaysaa waa walaalkaa If iyo Aakhirana waad seegaysaa, waxaad dilaysaana waa Ninkii garabkaaga ahaa ee reerka kula Oodi lahaa ee kuu ciidamin lahaa.
Waxaanu u soo jeedinaynaa in si Islaamnimo ah loo dhex galo labada reer, iyaguna si dhakhso ah u joojiyaan dagaalka, waxaanu ka rejaynaynaa inay maqlaan Ehelka iyo Ergooyinka dhex-dhexaadinaya oo dagaalkuna sidaa ku joogsado, sidaas ayaanu rajaynaynaa, iyagana ka codsanaynaa.”
Waxa kale oo uu sheegay Baashe, in salaadiin iyo cuqaal badan ay ka baxeen Sool, si ay u dhex-galaan beelaha walaalaha ah ee Taleex dirirtu ku dhexmartay, isagoo tilmaamay in arrimaha noocaasi ah ay ku fiican yihiin in lagu dhameeyo dhaqan ahaan.
Waxaanu yidhi “Salaadiin iyo cuqaal badan ayaa ka baxay degaanka Laascaanood, markaas arrintan oo kale waxa ku fiican in dhaqanka loo daayo, haddii laga maarmi waayo waxay noqonaysaa in Guurtidu tagto oo dad isku dhafan oo kala reero ahi meesha tagaan, laakiin. Xagga siyaasiyiinta arrintan oo kale waxay ku haboon tahay in loo daayao dhaqanka.”
By: Khaalid Xabsi
Dawannews Hargeysa office
