Hargeysa (Dawan)- Madaxweynaha Somaliland Mudane Axmed Maxamed Maxamuud (Siilaanyo), ayaa shalay ka qayb-galay munaasibad loo sameeyay sannad guurada labaad ee ka soo wareegtay asaaskii Idaacadda qur’aanka kariimka ah ee Wasaaradda warfaafinta iyo khatinka tafsiirka Quraanka kariimka ah.
Munaasibadan oo lagu qabtay xarunta Wasaarada warfaafinta waxa kale oo ka soo qayb-galay Wasiirro, Wasiir-ku-xigeenno, culimada waaweyn ee dalka iyo shaqaalaha Wasaaraddaasi.
Madaxweyne Siilaanyo ayaa sheegay inay farxad u tahay ka soo qaybgalka sanadd guurada labaad ee Idaacadda qur’aanka kariimka “Waxaa farxad innoo ah in Idaacaddii FM-ta ahayd ee qur’aanka kariimka ay laba jirsatay, Idaacaddaas oo shacbiga Somaliland meel kasta oo ay joogaanba ay u riyaaqeen kana faa’iidaysteen, waxa maanta (shalay) dhammaaday tafsiirkii qur’aanka kariimka ee ka socday Idaacada qur’aanka oo Sheekhii marinayay iyo intii la socotayba ILLAAHAY ajarkeeda ha siiyo, ILLAAHAY baanu uga mahad naqaynaa nimcadaas. Waxaan mahad-naq gaar ah u gudbinayaa madaxda iyo masuuliyiinta Wasaaradda warfaafinta ee arrintan muhiimka ah hirgeliyay.” Ayuu yidhi Madaxweyne Siilaanyo
Madaxweynuhu waxa uu shacbiga ugu baaqay inay ka faa’iidaystaan khayrka bisha barakaysan ee Ramadaan, waxaanu yidhi “Khamiista waxa innoo bilaabmaysa bishii barkaysnayd ee Ramadaan, shacbiga Somaliland meel kasta oo ay joogaan-ba waxaan u dirayaa hambalyo, waxaanan ku guubaabinayaa in waajibka ILAAHAY ina saaray sidiisa u gutaan, waxaan ku baraarujinayaa inay ilaashadaan cibaadadooda, nabadgelyadooda iyo midnimadoodda oo ay ka fogaaadaan wixii ILLAAHAY innaga reebay iyo wax kasta oo shaydaanku jecel yahayba, aad baanad u mahadsantihiin.” Ayuu yidhi Madaxweynaha Somaliland Md. Axmed Maxamed Siilaanyo.
Wasiirka warfaafinta Cabdillaahi Maxamed Daahir (Cukuse) oo isna munaasibadaasi ka hadlay ayaa sharaxay barnaamijyada diiniga ah ee ka baxa qaybaha kala duwan ee ay ka kooban tahay Wasaaraddu, isaga oo arrintaasi ka hadlayayna waxa uu yidhi “Wasaaradda warfaafintu waa halka ugu badan ee ay culimadu ka shaqayso, waxa shaqaalaha wasaaradda ka mid ah 20 Sheekh oo barnaamijyo ka sii daaya Idaacadda qur’aanka, Idaacadda Radio Hargeysa iyo TV-ga qaranka, Idaacadda qur’aanku waxay gaar u tahay qur’aanka kariimka iyo tafsiirka, laakiin Radio Hargeysa waxa ka baxa oo laga dhagaystaa barnaamijyo diini ah oo badan oo Tafsiir leh, Siirooyin kale leh, oo dhamaantood culuunta diinta ku taxaluuqa, sidoo kale TV-ga qaranka ayay ka baxaan barnaamijyadaasi intaa in leeg oo dhamaantood aad wada dhagaystaan. Markaa anagu halkana Wasaaradda warfaafinta qaybta dhaqanka waxa ka hawlgala boqol fanaan, fafaantii dhaqankaa ka hawlgasha, waxa ka hawlgala 600 oo shaqaale ah oo wariyeyaal iyo farsamo yaqaano iskugu jira.” Ayuu yidhi Wasiir Cukuse
Wasiir Cukuse waxa kale oo uu sheegay in ka wasaarad ahaan ay masuuliyad iska saari doonaan sidii bisha barakaysan ee Ramadaan ay bulshada ugu soo gudbin lahaayeen barnaamijyo diini ah “Wasaaraddu waa wasaarad balaadhan mudane Madaxweyne, waxaanu isku dayaynaa 30-ka bisha Ramadaan kaalinta ay Wasaaradda warfaafintu ugu jirto Ummadda ay muuqan doonto oo barnaamijyo diini ah oo wacyigelin ah, barnaamijiyo nabaddgelyada ka hadlaya, barnaamijyo waddanoolaashaha iyo degenaashiyaha ka hadlaya, barnaamijiyo kala dambaynta ka hadlaya iyo barnaamijiyo tixgelinta sharciga ka hadlaya in aynu ku soo bandhigi doona. Madaxda barnaamijyada Idaacaddaha, TV-ga iyo Wargeysyaduna laba biloodba wey ka shaqaynayeen waanay dhantahayba.”
Sidoo kale Wasiirka diinta iyo awqaafta Somaliland Sheekh Khaliil Cabdilaahi Axmed oo halkaasi ka hadlay, waxa u yidhi “ILAAHAY baynu ku mahadinaynaa inuu inaga soo qaybgeliyay farxada munaasibada sanadd guurada labaad ee Idaacadda qur’aanka kariimka ee Madaxweyne Axmed Maxamed Siilaayo ILAAHAY waafajiyay inuu SWT u bilaabo qarankan iyo dalkan waxa diintooda, Imaankooda iyo dadnimadooda u kordhiya oo adduun iyo aakhiraba ka yeela dad ILAAHAY SWT ku xidhan. Ajar iyo xasanaad ayay ka helayaan cid kasta oo uu ugu horeeyo Madaxweynuhu iyo cid kasta oo ka caawisay oo ay ugu horayso Wasaaradda warfaafintu oo baahinaysa oo ajarka ay wada leeyihiin Wasiirka, Wasiir ku xigeenka, Agaasimayaasha iyo ilaa qofka waashmaanka ah ee banaanka taagan ee Idaacaddaas horseedka u ah diinteena noqonaysa ka ilaalinaya, intuba ajarka wey wadaleeyihiin ilaa Madaxweynaha.”
Dhinaca kale maamulaha Idaacadda qur’aanka kariimka ah
Maxamed Axmed Shabeel iyo Sheekh Maxamed Aadan oo ka mid ah culimadda Somaliland ayaa waramay muhiimada ay bulshada u leeyihiin qur’aanka iyo axaadiista ka baxa Idaacaddan.
Gabagabadii masuuliyiinta Wasaaradda warfaafinta ayaa Madaxweynaha halkaasi ku gudoonsiiyay kitaabka Quraanka Kariimka ah, halka Madaxweynuhuna Wasiirka warfaafinta iyo masuuliyiinta kale guddoonsiyay shahaado sharaf.
By. Khaalid Xabsi
Dawannews Hargeysa office