Guddoomiyaha UCID Oo Ku Baaqay In Tallo Laga Yeesho Saami-qeybsiga Kuraasida Wakiiladda

Hargaysa (Dawan): Guddoomiyaha xisbiga mucaaradka ah ee UCID Eng.  Faysal Cali Waraabe,  ayaa sheegay in danno  gaar ah  laga lahaa xeerka doorashadda Golaha  Wakiiladda ee muranku  ka abuuray saami-qeybsiga   isla markaana laga saaray ajandaha kalfadhiga 27aad ee Goluhu ku guddo jiro.
Waxaanu  tilmaamay in loo baahan yahay   in tallo midaysan laga yeesho samaynta xeerka doorashadda Golaha Wakiiladda iyo saami-qeybsiga kuraasta Wakiiladaba.
Eng. Faysal Cali Waraabe,   oo shalay  magaaladda Hargaysa  ugu waramay   warbaahinta ayaa  soo jeediyay  in aanay haboonayn in wakhtigan   la horkeeno Golaha  xeer hore ay iskugu khilaafeen Golihii ka horeeyay.  “Sannadkii  2005-tii  ayaa lagu heshiin waayay  Saami-qaybsiga  kuraasta Golaha  Wakiiladda,  oo sidaa ay imika uga baxeen xildhibaanadda gobolka  Awdal  ay uga baxeen.  Barigaa   Waxaanu  ku qancinay,  oo saddexdii  xisbi  ee jiray ay ku qanciyeen in ay ku meel-gaadh  noqoto  xeerka doorashadda Golaha Wakiiladdu,” ayuu yidhi Faysal Cali Waraabe.
 
Guddoomiyaha UCID oo ka hadlayay   ajendahaa Wakiiladda la hor keenay, waxa uu yidhi “Waxa  socota,  maxaa adiga kuu dan   ah  kuwa geeyayna xeerka doorashada Golaha  Wakiiladda dan gaar ah  ayay ka lahaayeen,  balse kamay ahayn wax hagaaji,  oo waa wax horeba golihii  kan ka horeeyay  ugu heshiin waayay Inay  geeyaan Golaha may ahan,  waana in arrinta la xaliyo oo in ay iska fadhiyaan ma aha,  waa in lagu heshiiyo wixii  looga guuri lahaa habkan imika ay  wax ku soo dooranayaan  haddii ay imika suurto-gal  tahayna lagu dhaqaaqo,  haddii kalena  in xeerka lagu qoro in habkaa looga guuri doono wakhi xaadirkan.”
 
Dawannews Hargeysa office
Khadar  M. Dhako