Shir Lagaga Hadlayay Nabad-gelyadda Iyo Horumarka Oo Lagu Soo Gabo-gabeeyay Qori-lugud

Qorilugud(Dawan):  Shir maalmihii  u danbeeyay uga socday  beelaha degga Caynaba iyo  degmada Qorilugud   ayaa shalay la soo gabagabeeyay. Shirkaasi  oo ay labadaasi beeelood kaga arrin sanayeen  horumarinta degaanka iyo nabad kuwada noolaanshaha.  Shirkaasi oo socday muddo todobaad ah waxaa ka qayb qaadanayay   madax-dhaqameed  badan oo  kala socday  beelaha Qori-lugud iyo Caynaba, oo isugu jiray salaadiin, cuqaal, wax-garad iyo oday dhaqameed. Waxaana  xidhitaankii  shirkaasi ka soo qayb galay xubno ka tirsan golaha wasiirrada Somaliland oo ay ka mid ahaayeen wasiirrada  madaxtooyadda, duulista iyo hawadda, wasiir ku-xigeenka kalluumaysiga.  guddoomiye ku-xigeenka koobaad ee xisbiga Kulmiye, maayarka  Burco  iyo xildhibaano ka tirsan golaha baarlamaanka.
Shirkan oo ay soo qaban qaabiyeen qurbo joogta degaankaasi  ayaa waxa laga  soo saaray   go’aamo la xidhiidha ilaalinta nabadgeliyadda iyo sidii loo horumarin lahaa degaamadaasi. Iyadoo ay go’aamadaasi si weyn u soo dhaweeyeen masuuliyiintii ka socday   xukuumadda Somaliland ee shirkaasi ka qayb galay.
 
Wasiirka madaxtooyadda   Xirsi Cali Xaji Xasan,  oo hadal ka jeediyay  munaasibadii xidhitaanka shirkaasi   ayaa  bulshadda ku dhaqan  degaankaasi  uga mahad celiyey shirkan ay kaga arrinsanayeen horumarinta iyo nabad ku wada noolaanshaha.
 
Xirsi Cali Xaaji Xasan, waxa  kale  oo uu sheegay in ay  xukuumadu  degaankaasi  ka fulisay mashaariic tiro badan, oo isugu jira dhinacyadda caafimaadka, waxbarashadda, biyaha iyo kuwo kale. Waxaanu yidhi  “Markii u dambaysay  halkan toddobo mashruuc  ayaanu  ka bilawnay oo markii dambena uu madaxwaynuhu  furay. Mashaariicdaasi oo  horumar ah,   oo degaanka lagu horumarinayo,  oo waxbarasho leh,  oo caafimaad leh, oo maamulkii degaanka leh, intaasiba  waxaa  loo  sameeyey si uu degaanka   horumar u gaadho”.
 
“Dawladu dacal walba waxay isku deyaysay in  degaankan ay nabad   ka  is-laaxiso, oo ay  cagaha u taagto,  iskuna daydo in aanu ka hadhin qaranka ee uu nabad galyo noqdo.  Intaa  waa la isku deyay haddii  dadka degaankuna maanta soo agaasimeen shirkan,  oo  ay ajiibayn,  oo  ku tabceen oo shirkan qabteen  aad iyo aad baan ugu hambalyeenayaa  guud ahaanba iyo dawlad ahaanba.   iskuna garab taagaynaa ” ayuu yidhi wasiir Xirsi.
 
Wasiirka duulista iyo hawada   Maxamuud Xaashi Cabdi ayaa isna  halkaasi ka hadlay ayaa tilmaamay in go’aamadda ka soo baxay shirkaasi  iyo qabashadda  shirkaasiba uu ahmiyad  weyn ugu fadhiyo  bulshadda degaankaasi iyo qaranka Somaliland. , maadaama lagaga hadlayey  horumarinta iyo  nabad galiyada.
 
Wasiirka Xaashi oo arrimahaasi ka hadlayayna waxa uu yidhi  “Aad  baan ugu farax sanahay shirkan lagaga hadlayey nabad galyadda.  Midnimada  dhexdooda, xoojinta iyo wixii la mid ah.  Waxaan  leeyahay hambalyo, runtii go’aamadda  ka soo baxay waxay ahaayeen go’aamo aad u meel mar ah, markaa aad baanu u soo dhaweenaynaa.”
 
Sidoo kale  gudoomiye ku xigeenka koowaad ee xisbiga KULMIYE  Maxamed Kaahin Axmed  iyo haldoorkii  kale ee ka qayb galay shirkaasi  oo isugu jiray  madax dhaqameed  iyo  siyaasiyiin  ayaa ku nuux nuuxsaday faa’iidada nabad galyadu u leedahay guud ahaan aadamaha. Waxaanay   kula dar-daarmeen  bulshadda degaankaasi  in meel looga soo wada jeesto ilaalinta iyo adkaynta nabadgeliyadda.  sidoo kale waxay  fareen  in loo midoobo horumarinta degaanka iyo   ta Somaliland.
By:Cabdi M.safwaan
Dawannews Hargeysa office