Hargaysa (Dawan): Xildhibaan Axmed Maxamed Diiriye (Nacnac), ayaa wax aan meel-mar ahayn iyo dacaayado raqiis ah ku tilmaamay hadalada ka soo yeedhay xildhibaanada mucaaridka ah ee Golaha Wakiilada, kuwaasi oo uu sheegay in ay caadaysteen eedaynta xukuumadda. Xildhibaan Nacnac, oo shalay magaaladda Hargaysa kula hadlay warbaahinta waxa kale oo uu sheegay in xukuumadda KULMIYE ay qabatay qoddobo la taaban karo oo aan la qarin Karin, isagoo carabka ku dhuftay in laga soo gudbay wakhtigii ummadda lagu mashquulin jiray wax aan jirin.
“Waa dacaayadoodii raqiiska ahayd ee weligood-ba ay odhan jireen. Kulmiye waxa uu qabtay indhahaa u macalin ah, waa wax la taaban karo. Laakiin hebel baa wax cunay waxaas waanu ka gudubnay,”ayuu yidhi Xildhibaan Nacnac.
Waxa kale oo uu sheegay xildhibaanku in aan dalka looga baqaynin in madaxweyne Siilaanyo uu Soomaali weyn ku darro.
“Ma ragayaga waddanka u soo halgamay ayaa Soomaali weyn lagu eedaynayaa. Ma madaxweyne Siilaanyo ayaa la leeyahay Somali weyn ayuu doonayaa isagoo labaatan jir ah ayuu duurka u seexday, kuwa waxaas ku hadlaya ayaa doonaya Somali weyn. Bulshadda Somaliland waxa aan leeyahay nabad-galyada ilaashadda oo feejigo dheeraad ah u yeesha,” ayuu yidhi Xildhibaan Axmed Maxamed Diiriye.
Dhinaca kale Xildhibaanku waxa kale oo uu soo dhaweeyay xukunkii maxkamad Holland u ku taallaa ay ku xukuntay Daahir Calawsow inuu raali-gelin ka bixiyo qoraalo been abuur ah oo uu ka faafiyay shirkadda DAHABSHIIL.
Dawannews Hargeysa office
