Hargeysa(Dawan): Dawladda hoose ee caasimadda Hargeysa ayaa soo iibsatay qalab lagu dhisayo wadooyinka kaasi oo ah wershad isku qasaysa Daamurka iyo Jayga iyo gadiidkii ka shaqaynayay, qalabaasi oo laga soo iibiyay dalka Itoobiya.
Qalabkan dhismaha ee ay soo iibsatay dawladda hoose ee Hargaysa oo shalay soo gaadhay caasimadda ayaa noqonaya qaybtii labaad ee qalabka dhismaha wadooyinka oo ay soo iibsato dawladda hoose ee caasimadda.Waxaana markii uu qalabkani soo gaadhay magaaladda Hargaysa, xarunta madaxtooyadda horteedda oo lagu hakiyay warbaahinta ugaga warbixiyay gudidda bilcida caasimadda Hargaysa, xubno ka tirsan golaha wasiirradda iyo masuuliyiinta dawladda hoose ee Hargeysa.
Maayarka Hargeysa Cabdiraxmaan Maxamuud Caydiid (Soltelco), ayaa ka warbixiyay qalabkan iyo noocyadiisa. Waxaanu sheegay in qalabkani uu noqonayo wejigii labaad ee soo gaadha Hargaysa, iyadoo sanadkii hore la keenay qaybo ka mid ah qalankani. C/raxmaan Soltelco, oo arrimahaasi ka hadlayayna waxa uu yidhi “Qalabka halkan maraysaa waa wejigii labaad ee qalabka dhismaha waddooyinka. Waxaa halkan marayaa waa wershaddii Jayga ridqaysay oo 150 tan soo saaraysa saacadiiba. Waxaana hore u yimid iska-rogooyinkii, Beldhowsartii, Bayfartii iyo iskaafeetarkii”. Maayarka ayaa sidoo kale waxa uu u mahad celiyay madaxweynaha Somaliland, wasiirka maaliyadda, wasiirka arrimaha gudaha iyo marwada koowaad oo uu sheegay in ay gacan ka gaysteen dedaalkii qalabkan lagu soo iibiyay.
Dhinaca kale, wasiirka maaliyadda, marwadda koowaad iyo wasiirka arrimaha gudaha oo ka mid ah gudidda bilicda caasimadda ayaa uga mahad naqay masuuliyiinta dawladda hoose ee Hargaysa qalabkan cusub ee ay soo iibsadeen, kaasi oo ay tilmaameen in uu wax weyn ka tari doono dhismaha jidadka guud ahaan dalka gaar ahaana caasimadda.
Wasiirka maaliyadda marwo Samsam Cabdi Aadan, oo halkaasi ka hadashay ayaa sheegtay in qalabkani uu astaan u yahay in Somaliland oo aan la aqoonsan ay hadana wax-qabsan karto. “Waxa kale oo ay astaan u tahay in cashuurta laga qaadayo gaadiidka iyo dadku ay dib ugu noqonayso wadooyinkii la mari lahaa. Madaxweynuhu wuxuu nagu hoggaamiyaa in wadanka horumar la gaadhsiiyo, tana waxay ka mid tahay horumarkii. ILLAAHAY ayaynu ugu mahadnaqaynaa, waxaynu uga mahadnaqaynaa sidoo kale Maayarka oo fikiray oo soo helay sidii aynu lacag jaban ugu heli lahayn qalabka waayo? Toban milyan oo dollar kama yaraateen haddii aynu meelo kale ka raadin lahayn” ayay tidhi Marwo Samsam.
Sidoo kale wasiirka arrimaha gudaha Cali Maxamed Warancadde, ayaa keenitaanka qalabkan ugaga mahadnaqay madaxweynaha iyo marwada qaranka oo uu sheegay inay ku hawlan yihiin wanaajinta bilicda magaalooyinka Somaliland. “Waxaan u mahadnaqayaa maayarka, xoghayaha iyo golaha degaanka, waxaanay raggaas oo maayarku ugu horreeyaa suuro galiyeen dhaqaalaha qalabka lagu soo iibiyay. Waxaan u mahadnaqayaa wasiir Samsam oo bixisay lacagtii u horaysay oo hal milyan oo Dollar ah. Waxaan filayaa inay dhammaan muuqaalka magaalooyinka Somaliland dhawaan is-bedeli doonaan oo Hargeysa ugu horrayso. Waxayna noqon doonaan qalabkan marka Hargeysa lagaga shaqeeyo mid gobollada kale u gudba”ayuu yidhi Cali Waran Cadde. Marwadda koowaad Aamina Sheekh Maxamed Jirde (Aamina-weris), oo ugu dambeyn halkaasi ka hadashay ayaa wax lagu farxo ku tilmaantay in dawladda hoose ee Hargaysa ay soo iibsato qalab noocani ah.Waxaanay tidhi “Runtii arrinta halkan ka dhacday, waa wax lagu farxo. Soomaalidu waxay tidhaahdaa huggaaguna wuu kula baryo tagaay’e. Hargeysa waa caasimadii Somaliland, Hargeysa quruxdeeda, bilicdeeda, nadaafadeeda iyo habka ay u samaysan tahay waa waxaynu ku faanayno oo sharafteena, gobonnimadeena iyo ictiraafkeena soo dedejin karta.”
Dawannews Hargeysa office
