Caynaba (Dawan): Maayarka magaaladda Caynaba ee xarunta gobol Saraar, ayaa shalay shil baabuur ku galay meel u dhaxaysa degaamadda Oog iyo Ceel-dhaab, waxaana shilkaasi ku dhaawacmay maayarka Caynaba iyo afar qof oo kale, kuwaasi oo kala ahaa xoghayaha dawladda hoose ee Caynaba, xildhibaan Abokor Shidde Cali oo ka tirsan golaha degaanka Caynaba, weriyihii TV-ga qaranka ee magaaladda Caynaba Jaamac Boode-cade, iyo sidoo kale derawalkii baabuurka maayarka. Baabuurka maayarka ayaa la sheegay in uu qayb ka ahaa, xubno soo dhawaynayay wefti odayaal ah oo ka socday gobolka Buuhoodle, oo shalay lagu soo dhaweeyay magaaladda Caynaba.Waxa la sheegay in dadkii shilkaasi ku dhaawacmay dhawaacoodda la geeyay cusbitaalka magaaladda Caynaba, halka laba xubnood oo dhaawacoodu cuslaa loo gudbiyay dhinaca cusbitaalka magaaladda Burco halkaasi oo lagu daawaynayo.
Guddoomiyaha gobolka Saraar Cali Maxamed Faarax, ayaa warbaahinta uga warbixiyay shilkaasi iyo khasaarihii ka dhashay. Waxaanu yidhi “Saaka (shalay subax), anagoo ka mid ahayn wefti ka hor tegayay duqay ka imanayay Buuhoodle, ayaa waxaa ku dhacay inta u dhaxaysa Oog iyo Ceel-dhaab, taayir ayaa u baxay gaadhiga. Cidi kuma dhiman, balse shan qof ayaa ku dhaawacmay, oo maayarkii Caynaba ka mid yahay, iyo xoghayihii dawladda hoose ee Caynaba. Waxaanau cusbitaalka Burco u qaadnay xildhibaan Abokor iyo derawalkii maayarka oo dhaawacoodu aad u culus yahay.”
Dawannews Hargeysa office
