Hargaysa (Dawan): Madaxweynaha Jamhuuriyadda Somaliland Md. Axmed Maxamed Maxamuud (Siilaanyo), ayaa shalay dhagax dhigay xarun cusub oo loogu tallo galay in ay noqoto taliska guud ee ciidamadda booliska Somaliland, taasi oo laga hirgelinayo magaaladda Hargaysa.Dhismahan waxa gacan weyn ka geysatay Dawladda Ingiriiska oo iyagu horena u dhisay dhismaha qadiimiga ah ee taliska ciidanka Booliska oo ay bineeyeen 1936-kii iyo qeybta danbe oo ay dhiseen 1942-kii.
Ka hor dhagax dhiga, madaxweynuhu waxa uu salaan sharaf kaga qaatay xarunta taliska guud ee ciidamadda booliska cutub ka tirsan ciidanka booliska, oo ay hor kacayeen ciidamadda Baanbooyda. Madaxweyne Axmed Siilaanyo oo munaasibadaasi dhagax dhiga hadal kooban ka jeediyay ayaa dhisamahaasi ku tilmaamay mid muhiimad weyn u leh qaranka Somaliland, isagoo mahad naq u jeediyay dawladda Ingiriiska oo ka taageertay dhismahani.
“Aad iyo aad ayaan ugu farax sanahay in aan dhagax dhigo mashruucan oo ah mid aad u mihiim ah. Waxaanan u mahad celinayaa dawladda Ingiriiska oo dhismahan naga caawisay iyo cid kasta oo nagala qayb gashay hawshaasi dhismaheedda. Muhiimad weyn ayay u leedahay qaranka Somaliland ILLAAHAY-na waxaan ka baryayaa in uu inagu guuleeyo” ayuu yidhi madaxweyne Axmed Siilaanyo.
Taliyaha ciidamadda booliska sareeye guuto C/laahi Fadal Iimaan, oo isna halkaasi ka hadlay ayaa madxweynaha waxa uu xog-waran ka siiyay dhismahaasi iyo cidda maalgelinaysa iyo sidoo kale cida dhisaysaba. Waxaanu yidhi “Mudane, madaxweyne waxaa farxad iyo sharaf aad u weyn noo ah in aad maanta (shalay0 noo dhagax dhigto dhismaha taliska guud ee ciidanka jamhuuriyadda Somaliland . iyadoo dhismaha uu hadda ku shaqeeyo taliska ciidanka boolisku la dhisay sanadkii 1936-kii, iyadoo kuwa kalena la dhisay 1942-ki, ilaa wakhtigaasi ayuu jiray.” Dhismahani waxaa dhisaysa dawladda Ingiriiska oo markii horeba dhistay, waxaana maalgelisay hay’adda UK ee DFID, waxaana fulinaysa UNOPS, shirkad magaceedda la yidhaahdo Tayasiir oo Somaliland ah ayana dhisaysa.”
Wasiirka wasaaradda arrimaha gudaha Cali Maxamed waaran Cade, ayaa isna halkaasi hadal ka jeediyay waxaanu yidhi “Halkani, waa halkii ciidanka booliska Somaliland lagu aasaasay, dawladda Ingiriiska ayaana inoo dhistay 1936-kii, maanta oo aynu joogno sanadka 2016-kana iyaga (Ingiriiska), ayaa inooga dhisaya guri casri ah oo noqonaya taliska guud ee booliska Somaliland. Sideetan sanno kadib ayaa Ingiriisku inagu soo noqday oo aynu dib saaxiib u noqonay.”
Dawannews Hargeysa office
