Caynaba (Dawan): Maayarkii degmadda Oog C/rasaaq C/salaan Afrikaani iyo xoghayihii degmadaasi Axmed Cali Nuur iyo sidoo kale khasnajigii dawladda hoose ee degmadda Oog ayaa la sheegay in ciidamadda gobola Saraar ay xabsiga u taxaabeen. Waxa la soo weriyay in sababta xadhiga masuuliyiintaasi uu ka dambeeyay khilaaf muddo u dhexeeyay saraakiishan, kaasi oo sababay in ay wada shaqeyn kari waayeen isla markaana ay gacanta iskula tageen ka dibna dhawr jeer oo la isku deyay in la dhex-dhexaadiyo wax xal ah loo waayay. Khilaafka masuuliyiinta degmadda Oog ayaa la sheegay in uu ka dhashay kala dambayn la’aan iyo awood maroorsi dhexdoodda, isla markaana uu mid waliba ka kale ku eedeynayay in uu shaqadiisii ku soo xad-gudbay. Iyadoo ay taasina dhalisay in ay is-taagto adeegyaddii ay bulshadda uga masuulka ahaayeen. Warku waxa uu intaas ku darayaa in xadhiga masuuliyiinta degmadda Oog uu bixiyay Wasiir ku xigeenka Maamulka goboladda iyo degmooyinka ee wasaaradda arrimaha gudaha Jaamac C/laahi Biin, oo maalmihii la soo dhaafay booqasho ku joogo magaaladda Oog si uu u furdaamiyo khilaafka loo caal waayay ee u dhaxeeya masuuliyiinta degmadaas. Wasiir Ku xigeenku waxa uu faray masuuliyiinta gobolka Saraar in la xidho masuuliyiintan oo uu ku eedeeyay inay u dhaqmeen qaab qayrul masuulnimo ah.Dhinaca kale shaqaalaha dawladda hoose ee degmadda ayaa dhawaan sheegay inaanay muddo dhawr bilood ah wax mushahar ah qaadan, waxaanay ku eedeeyeen in masuuliyiinta degmadu ay ku tagri faleen kharashaadkii dakhligii soo galayay dawladda Hoose.Shaqaaluhu waxay ku doodeen in Maayarka, Xoghayaha iyo khasnajiga dawladda hoose ee Oog ay cagaha kula jiraan maamul xumo iyo musuqmaasuq albaabada u xidhi kara dawladda hoose haddii aanay dawladda dhexe ka qaadin tallaabo sharciya oo adag. Wasiir Jaamac Biin oo aanu xalay isku deynay inaanu dhacdadan wax ka weydiino ayay noo suurto-geli wayday ka dib markii uu qaban waayay telefoonkiisa gacanta oo aanu dhawr jeer oo kala duwan garaacnay.
Dawannews Hargeysa office
