Hargeysa (Dawan)- Adeegga Lacagta Telefoonka lagu xawilo ee ZAAD ee Shirkadda Isgaadhsiinta ee TELESOM, ayaa markii labaad waxa soo if-baxday dhaqdhaqaaqyo lagu dhacayo bulshada isticmaasha adeegaas oo koox tuugo ahi ay ku dhacayaan dadweynaha reer Somaliland.
Shirkadda Telesom, ayaa qirtay tuugadan cusub, waxaanay farriin u soo direen macaamiisheeda oo ay ku booriyeen inay ka taxadaraan arrintan. Fariinta TELESOM, waxay u qornayd sidan; “Macmiil, fariimaha lacagta ZAAD waxay ku soo dhacaan 898 iyo 222 oo kala ah Doolarka iyo Shilling-ka. Haddaba, fadlan iska jir fariimaha laga soo diro lambar caadi ah oo loo ekaysiiyay lacagta ZAAD ah, hana celin ilaa aad hubiso hadhaagaaga.”
Muddo 33 maalmood ah ayaa u hadhay wakhtigii dawladdu u qabatay shirkadaha SOMTEL iyo TELESOM, inay ku fuliyaan qoddobkii ka khuseeyay go’aamadii xukuumadda ee la xidhiidhay suulinta sicir-bararka. Waxaana lagu amray inay seerfarkooda adeegyada ZAAD iyo E-dahab ka saaraan wixii ka hooseeya 100 Doolar. Ka dib markii loo arkay inay door weyn ku leeyihiin sicir-bararka iyo sarif-bararka is-barkan ee dalka ka taagan iyo waliba qiima dhaca la daadegay lacagta dalka.
Tan iyo markii xukuumaddu u qabatay shirkadahan inay go’aankii madaxweynaha ku fuliyaan ugu dambayn 1-da Bisha July ee fooda innagu soo haysa, dad badan oo isticmaali jiray Zaad iyo E-dahab ayaa bilaabay inay lacagtii ay ku kaydsadeen ee adkayd ay kala baxaan adeegyadan la xaddidayo.
Dawannews Hargeysa office